रुसी सुरक्षाफौजहरूले पूर्वी युक्रेनमा अग्रता हासिल गरिरहेको दुईजना अमेरिकी अधिकारीहरूले सीएनएनलाई बताएका छन् । 

त्यस्तै अमेरिकाले युक्रेनी सैनिकहरूलाई हालै पठाएको हिमार्स हतियार प्रणाली सहितका हातहतियारले युद्धको अवस्था नबदल्ने पनि उनीहरूको भनाइ छ । 

अमेरिकी रक्षा मन्त्रालयले हालै ४५ करोड रुपैयाँ बराबरको नयाँ सहायता प्याकेज युक्रेनलाई सहायताका रूपमा उपलब्ध गराएको छ । उक्त प्याकेजमा चारवटा हिमार्स मल्टिपल लोन्च रकेट सिस्टम, १८ वटा गश्ती डुंगा, ३६ हजार आर्टिलरी शेल, १२ सय ग्रिनेड लोन्च। र दुई हजार मशिनगन छन् । 

यी सीमित दायरा र संख्याका हतियार रुसी भूमिमा नपुगून् भनी अमेरिकाले ढुक्क हुन चाहेको छ । अझ रुसी सैनिकहरूले युक्रेन आइपुगेका एम७७७ हावित्जर तोप लगायतका हतियारलाई ध्वस्त पारिरहेका छन् । 

अमेरिकाले पूर्वी युक्रेनमा युद्ध लामो समयसम्म जाने अपेक्षा गरेको छ । चार महिनादेखि चलिरहेको युद्ध हालैका दिनमा निर्णायक क्षणमा प्रवेश गरेको छ । 

युक्रेनी सेनाले पुरानो हतियार प्रणालीमा फिट हुने सोभियतकालीन गोलीगट्ठा सिध्याउन थालेका छन् । पश्चिमी सरकारहरू युक्रेनलाई सहायता बढाउने कि नबढाउने विषयमा कठोर निर्णय लिन बाध्य छन् ।