ग्रीसले अर्को हप्तादेखि ३० वर्ष र त्यसभन्दा माथिका मानिसहरूलाई दोस्रो कोभिड–१९ विरूद्धको दोस्रो अतिरिक्त (बुस्टर) खोप लगाउने तयारी गरेको छ । सरकारले यसका लागि सम्बन्धित स्वास्थ्य निकायमा स्वीकृतिका लागि प्रस्ताव राखेको छ । 

ग्रीकको राष्ट्रिय समाचार संस्था (एएमएनए)का अनुसार, देशका खोप अधिकारीहरूले ६० वर्ष र त्यसभन्दा माथिका व्यक्तिहरूले दोस्रो बुस्टर खोप लगाउनुपर्नेमा जोड दिएपछि सरकारले यसबारे प्रस्ताव अघि बढाएको हो ।

यस वर्षको अप्रिलदेखि नै उक्त उमेर समूहका लागि खोपहरू उपलब्ध रहेको सरकारले बताएको छ । जून महिनामा दैनिक थप संक्रमितहरूको सङ्ख्या बढ्दै गएपछि सरकारले दोस्रो अतिरिक्त खोपको तयारी गरेको हो । 

बिहीबारको तथ्याङ्कमा ग्रीसले पछिल्लो २४ घण्टामा १० हजार ४७४ थप व्यक्तिमा कोभिड सङ्क्रमण पुष्टि गरेको थियो भने यो अवधिमा थप १७ जनाको मृत्यु भएको थियो । देशभर ८८ जनालाई भेन्टिलेटरमा राखी उपचार भइरहेको छ ।