जयनगर–कुर्था रेल मार्गमा नियमित मालबाहक रेल सेवा सञ्चालन गर्न ५ जिल्लाका उद्योगी व्यवसायीले माग गरेका छन् । 

नेपाल रेल्वे कम्पनी लिमिटेडका पदाधिकारीसँगको छलफलका क्रममा मधेश प्रदेशअन्तर्गत सप्तरी, सिरहा, धनुषा, महोत्तरी र सर्लाहीका उद्योगी व्यवसायीले मालबाहक रेल सेवा सञ्चालन गर्न माग गरेका हुन् ।

हाल जयनगर–कुर्था रेल मार्गमा सञ्चालन भइरहेको रेल सेवासँगै मालबाहक रेल समेत सञ्चालन गरिए भारतसँग सीधा व्यापार सम्बन्ध हुनुको साथै सस्तो मूल्यमा समाधान आयात हुने तथा त्यसबाट महंगी समेत नियन्त्रणमा आउने उद्योगी व्यवसायीको भनाइ छ । 

छलफलमा उद्योगी व्यवसायीले तत्कालका लागि दैनिक ५/६ ट्रक मालसामान आयात गर्ने र पछि क्रमशः बढाउँदै जाने भएकाले मालबाहक रेल सेवा घाटामा नजाने दाबी गरेका थिए । ‘अहिले चलिरहेको रेल सेवामै हामीले मालबाहक रेल सेवा पनि चलाउन माग गरेका छौं,’ जनकपुरधाम उद्योग वाणिज्य संघका उपाध्यक्ष अम्बोकुमार साहले भने, ‘नेपाल रेल्वे कम्पनीका पदाधिकारीले मालबाहक रेल चलाउन आफूहरू सकारात्मक रहेको र तत्कालका लागि जनकपुरधाममा कति परिमाणमा मालसामान ल्याउन सकिन्छ भनेर उद्योगी व्यवसायीसँग यकिन गरेर तथ्यांक उपलब्ध गराउन आग्रह गर्नुभएको छ ।’

तथ्यांककै आधारमा मालबाहक रेल सेवा सञ्चालन गर्न अन्य निकायसँग समन्वय गरी निर्णय गर्ने नेपाल रेल्वे कम्पनीका पदाधिकारीले आश्वासन दिएको उपाध्यक्ष साहले बताए ।

छलफलका क्रममा उद्योगी व्यवसायीबाट आएका सुझाव, सल्लाहका आधारमा मालबाहक रेल सेवा सञ्चालनको तयारी गरिने नेपाल रेल्वे कम्पनीका महाप्रबन्धक निरञ्जनकुमार झाले जानकारी दिए । ‘भारतबाट दैनिक कति परिमाणमा मालसामान ल्याइन्छ भनेर तथ्यांक मागेका छौं,’ उनले भने ।

तथ्यांक उपलब्ध भएपछि प्रक्रिया अघि बढाइने झाको भनाइ छ । 

गत २०७८ चैत २० गते प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले जयनगर–कुर्था रेल मार्गमा रेल सेवाको उद्घाटन गरेका थिए । त्यसयता रेल सेवा नियमित रूपमा सञ्चालन हुँदै आएको छ ।

दैनिक जयनगरबाट बिहान ८ः३० र दिउँसो ३ बजे छुट्ने गर्छ भने कुर्थाबाट बिहान १०ः३० र साँझ ५ः१५ बजे रेल छुट्ने गर्छ । यात्रु चढाउन र झार्न ७ ठाउँमा स्टेसन/हल्टको व्यवस्था गरिएको छ । कुर्था, परवाहा, बैदेही, महिनाथपुर, खजुरी, इनर्वा र जयनगरमा स्टेसनको व्यवस्था छ ।

रेल सेवा सञ्चालनका लागि हाल २६ भारतीय र ५९ नेपाली कर्मचारी कार्यरत रहेको कम्पनीले जनाएको छ । भारतीय कर्मचारीमा खासगरी चालक दलका र केही इन्जिनीयर रहेको महाप्रबन्धक झाले जानकारी दिए ।

कुर्थाबाट जयनगर वा जयनगरबाट कुर्था ३५ किलोमिटरका लागि सामान्य सिटमा ९० रुपैयाँ भाडादर तोकिएको छ । वातानुकुलित सेवातर्फ भने ४५० रुपैयाँ भाडादर कायम गरिएको कम्पनीले जनाएको छ ।