सरकारले पेट्रोलियम पदार्थमा कर घटाउने निर्णय गरेसँगै नेपाल आयल निगमले पेट्रोलियम पदार्थको मूल्य घटाएको छ । गएराति १२ बजेदेखि लागु हुने गरी निगमले पेट्रोलमा २० रुपैयाँ प्रतिलिटर मूल्य घटाएको हो । यससँगै आजदेखि प्रतिलिटर पेट्रोलको मूल्य १७९ रुपैयाँ कायम गरिएको निगमले जनाएको छ । 

यस्तै डिजेल तथा मट्टितेलमा प्रतिलिटर २९ रुपैयाँ घटाइ १६३ रुपैयाँ कायम गरिएको छ । एलपी ग्यास र हवाई इन्धनको मूल्य भने हाललाई यथावत राखिएको निगमले जनाएको छ । शनिबार बसेको सत्ता गठबन्धनको बैठकले जनतालाई राहत दिन पेट्रोलियम पदार्थको मूल्य घटाउन निर्देशन दिएको थियो ।

लगत्तै उद्योग बाणिज्य तथा आपूर्तिमन्त्री दिलेन्द्र प्रसाद बडुले सरकारको तर्फबाट पत्रकार सम्मेलन गरेर मूल्य घटाइएको घोषणा गरेका थिए । मूल्यवृद्धि उच्च भएको भन्दै मूल्यवृद्धि नियन्त्रण गर्न सरकारमाथि दवाव पर्दै आएको थियो । सरकारले बजार अनुगमनलाई पनि तीव्र पार्ने जनाएको छ ।