नेकपा एकीकृत समाजवादी पार्टीका अध्यक्ष माधव नेपालले पार्टीबाट सरकारमा सहभागी भएका मन्त्रीहरूको राजीनामा पत्र आफूसँग रहेको बताएका छन् । 

केही मन्त्रीहरूले राजीनामा पत्र आफूलाई दिएको र आफूले गोजीमा बोकेर हिँडेको उनले बताए । आवश्यक पर्दा सार्वजनिक गर्ने पनि नेपालले बताए । 

एकीकृत समाजवादी सम्बद्ध अखिल नेपाल महिला संघले आइतबार आयोजना गरेको कार्यक्रमलाई सम्बोधन गर्दै नेपालले भने, ‘केही मन्त्रीहरूले राजीनामा पत्र मलाई दिनुभएको छ । त्यो गोजीमा बोकेर हिँडेको छु । आवश्यक परेको बेलामा बाहिर ल्याउन सक्छु तर, राजीनामा पत्र नै चाहदैन । हामीले पठाएको पुनर्गठन पत्र नै पर्याप्त छ ।’

नेपालले छिटोभन्दा छिटो मन्त्रिमण्डलको पुनर्गठन हुने पनि बताए । ‘आशा गरौँ आजै मन्त्रिमण्डल पुनर्गठन हुने छ । बजारमा धेरै हल्लाहरू आएका छन् । ती हल्लाको पछि लाग्न आवश्यक छैन’, नेपालले भने ।

एकीकृत समाजवादीबाट मन्त्री बनेकाहरूलाई फिर्ता बोलाउने र नयाँलाई पठाउने बारे सचिवालयले गरेको निर्णय केन्द्रीय कमिटीले अनुमोदन गरेको र त्यही निर्णय कार्यान्वयन हुने पनि नेपालले बताए । 

‘एउटा निर्णय भइसक्यो । निर्णय भइसकेको कारण त्यसलाई फेरबदल गर्नु हुँदैन भन्ने कुरा केन्द्रीय कमिटीले भनेको छ । निर्णय फेरियो भने अरुको कुरा हावी हुन्छ । अरू निर्णय गर्दा पनि कार्यान्वयन नहुने अवस्था आउँछ भन्ने कुरा केन्द्रीय कमिटीमा भएको छ’, नेपालले भने । 

फिर्ता फेरबदल गर्दा महिलालाई प्राथमिकता दिनुपर्ने र भौगोलिक हिसाबले पनि उचित प्रतिनिधित्व हुनुपर्ने कुरा जोडदार रुपमा उठेको थियो । तर,  नेपालले भने सबै क्षेत्रलाई उचित प्रतिनिधित्व गराउने पक्षमा रहेको तर, कहिलेकाहीँ बाध्यता आइपर्ने बताए । 

कतिपयमा आफूले पद पाइसकेपछि नछाड्ने प्रवृत्ति रहेको भन्दै नेपालले इमान्दार नेता हुन चाहनेले पार्टीको निर्णय कार्यान्वयन गराउन तयार हुनुपर्ने बताए । 

‘व्यक्तिहरू आफू बसिसकेपछि हट्नै नचाहने प्रवृत्ति छ । पार्टीको इमान्दार कार्यकर्ताले सानोभन्दा सानो निर्णय पालना गर्नुपर्छ । राम्रो नेता बन्न चाहने व्यक्तिले पार्टीको निर्णय कार्यान्वयन गर्न तयार हुनुपर्छ’, उनले भने । 

सम्बोधनको क्रममा नेपालले नेपालमा विदेशीको आँखा परेको र देश जटिल मोडमा रहेको पनि बताए । 

त्यसबाहेक, राजतन्त्र फर्काउने आवाज उठेको र त्यसलाई कुनै हालतमा सफल हुन नदिने पनि नेपालले बताए । 

स्थानीय तहमा केही ठाउँमा स्वतन्त्र व्यक्तिहरूले चुनाव जितेको चर्चा गर्दा उनले स्वतन्त्र जितेर हुँदैन भन्ने कुरा समयक्रमसँगै पुष्टि हुँदै जाने पनि बताए । 

उनले भने, ‘स्वतन्त्रको लहर चल्दै छ तर, स्वतन्त्रले हुँदो रहेनछ भन्ने कुरा विस्तारै पुष्टि हुँदै जान्छ ।’

आफूहरू आगामी निर्वाचनमा पनि गठबन्धन कायम राख्ने पक्षमा रहेको नेपालले बताए ।