लोकगायिका दिलमाया सुनार मृत्यु प्रकरणमा विवाहेतर सम्बन्ध कारण हुन सक्ने प्रारम्भिक निष्कर्ष प्रहरीले निकालेको छ ।

सुनार शुक्रवार साँझ तारकेश्वर नगरपालिकाको नेपालटारमा रहेको आफ्नै कोठामा मृत फेला परेकी थिइन् । 

प्रहरीले उनको मृत्युमा शंकास्पद भूमिका रहेको आशंकामा सिन्धुपाल्चोकको चौतारा साँगाचोकगढी नगरपालिकाका सूर्य भनिने खिलबहादुर श्रेष्ठलाई नियन्त्रयणमा लिएर अनुसन्धान गरिरहेको छ । 

प्रहरीको प्रारम्भिक अनुसन्धानमा लोकगायिका सुनार र खिलबहादुर लिभिङ टुगेदरमा बस्दै आएको खुलेको छ । 

काठमाडौं उपत्यका अपराध अनुसन्धान कार्यालयका अनुसार उनीहरू विगत १५ महिनादेखि लिभिङ टुगेदरमा बस्दै आएका थिए । 

गायिका सुनारले छिमेकीलाई उनी आफ्नो पति भनेर चिनाएकी थिइन् ।

गायिकाले आत्महत्या गरेको भनिएको सल काठमाडौंको महाराजगञ्जस्थित चप्पल कारखानाको एक खोल्सामा भेटिएको छ ।

उनले बोक्दै आएको मोबाइल फोन भने अझै फेला परेको छैन ।

पोस्टमार्टमका लागि उनको शव टिचिङ अस्पतालमा लगिएको छ । पोस्टमार्टमको रिपोर्ट आएपछि मात्र हत्या वा आत्महत्या भन्ने खुल्ने प्रहरीले बताएको छ ।

दोहोरी साँझमा चिनजान

भक्तपुरको गोठाटारमा सुन व्यवसाय गर्दै आएका श्रेष्ठ र गायिका सुनारको भेट ३ महिनाअगाडि काठमाडौंको चुच्चेपाटीमा रहेको दर्पण दाहोरीसाँझ (हाल नाम परिर्वन भएको र नाम नखुलेको)मा भएको प्रहरीले पत्ता लगाएको छ ।

दोहोरीसाँझमा भएको चिनजानपछि माया बसेको भनेर श्रेष्ठले बयान दिएका छन् । पूर्वपतिसँग सम्बन्धविच्छेद भएपछि सुनार काठमाडौंमा एक्लै बस्दै आएकी थिइन् । 

उनका एक छोरा समेत छन् । प्रहरीका अनुसार गायिका सुनारले श्रेष्ठसँग आफ्नो करियर र छोराको भविष्यबारे चिन्ता व्यक्त गर्ने गरेको पाइएको छ ।

खिलबहादुर पनि विवाहित पुरुष हुन् । उनका पत्नी र ४ छोराछोरी रहेको खुलेको छ ।

अघिल्लोपटक विष सेवनबाट पनि बाँचेकी थिइन् गायिका

प्रहरीको प्रारम्भिक अनुसन्धानमा लोकगायिका सुनारले यसअघि पनि विष सेवन गरेर आत्महत्या प्रयास गरेको खुलेको छ ।

नियन्त्रणमा लिइएका खिलबहादुरले त्यतिबेला अस्पताल लगेर बचाएको बयान दिएका छन् । उनका अनुसार शुरूमा सामाखुशीमा रहेको ग्रीनसिटी अस्पतालमा लगिएको थियो । 

पैसाको अभावमा त्यहाँ उपचार गर्न नसकिएपछि महाराजगञ्जस्थित त्रिवि शिक्षण अस्पताल लगिएको थियो । त्यहाँबाट निको भएर फर्केपछि सुनारले नियमित औषधि सेवन गर्दै आएकी थिइन् ।

घटना भएको दिन सँगै बसेका थिए बास

घटना घटेको दिन अर्थात शुक्रवार राति खिलबहादुर र दिलमाया पेय पदार्थ र मासु खाएर सँगै बसेको खुलेको छ ।

खिलबहादुरले एक ग्यालेन लोकल रक्सी र खसीको मासु ल्याएका थिए । मासुसँगै खिलबहादुरले रक्सी र दिलमायाले स्प्राइट खाएको पाइएको छ ।

गायिकाको मृत्यु भएपछि बिहान ४ बजे श्रेष्ठ उनले पासो लगाएर आत्महत्या गरेको भनिएको सल लिएर फरार भएका थिए । प्रहरीले श्रेष्ठलाई शनिवार बिहान नियन्त्रणमा लिएको थियो ।

उनकै बयानका आधारमा सल फेला परेको थियो । मोबाइल कहाँ छ ? भन्ने कुरा उनले नबताएकाले फेला नपरेको प्रहरीले बताएको छ । 

मृतक गायिकाका बुवाले छोरीको हत्या भएको भन्दै किटानी जाहेरी दिएका छन् ।