नयनराज पाण्डेद्वारा लिखित चर्चित उपन्यास ‘लू’माथि निर्माण हुन लागेको फिल्मलाई ‘जात्रा’ फ्रेम्ड निर्देशक प्रदीप भट्टराईले निर्देशन गर्ने भएका छन् ।

कारो फिल्मस्ले बनाउन लागेको फिल्मको निर्देशकका रूपमा उनी अनुबन्धित भएका हुन् ।

निर्माण कम्पनी कारो फिल्मस्की प्रबन्ध निर्देशक निशा खरेल र निर्देशक भट्टराईबीच लिखित सम्झौता भएको छ । 

निर्देशक फाइनल भए पनि कलाकारहरू भने तय भइसकेका छैनन् । चाँडै नै कलाकारहरू समेत तय गरिने निर्माण कम्पनी कारो फिल्मस्ले जनाएको छ ।

निर्माण कम्पनीले उपन्यासजस्तै फिल्मलाई पनि रोचन बनाउन कुनै कसर बाँकी नराख्ने बताएको छ । ‘जात्रा’, ‘जात्रैजात्रा’ र ‘शत्रुगते’ गरी ३ फिल्म निर्देशन गरेका भट्टराईका ३ वटै फिल्म व्यावसायिक रूपमा सफल छन् ।

चर्चित उपन्यासमाथि बन्न लागेको फिल्म निर्देशनको जिम्मेवारी पाउँदा डबल खुशी भएको निर्देशक भट्टराईले बताएका छन् । ‘नयनराज पाण्डे दाइको अत्यन्तै मन पराइएको उपन्यास ‘लू’माथि फिल्म बन्दा मात्रै पनि म खुशी हुने थिएँ । अझ ‘लू’को निर्देशन गर्ने जिम्मेवारी मैले पाउँदा झन् डबल खुशी भएको छु,’ भट्टराईले फेसबूकमा लेखेका छन्, ‘डर पनि छ, उत्साह पनि छ अनि राम्रो टीम अप गरेर ‘लू’लाई राम्रो फिल्म बनाउने विश्वास पनि छ ।’