बाग्मती प्रदेश खेलकुद विकास परिषद् तथा न्यु डायमन्ड स्पोर्ट्स क्लबको संयुक्त आयोजनामा बाग्मती प्रदेश न्यु डायमन्ड कप खुला महिला भलिबल प्रतियोगिता मंगलवारदेखि हुने भएको छ ।

प्रतियोगितामा न्यु डायमन्डसहित नेपाल एपीएफ क्लब, नेपाल प्रहरी क्लब र काठमाडौंको परोपकार आदर्श मावि गरी ४ टीमको सहभागिता रहने प्रतियोगिता संयोजक कुमार राईले सोमवार आयोजित पत्रकार सम्मेलनमा जानकारी गराए ।

सहभागी टीमबीच पहिले राउन्ड रोविन लिगका आधारमा खेल हुनेछ । राउन्ड रोविनमा शीर्ष २ स्थान हात पार्नेले उपाधिका लागि प्रतिस्पर्धा गर्नेछन् । तेस्रो र चौथोले तेस्रो स्थानका लागि खेल्ने छन् ।

शीर्ष ४ स्थान हात पर्ने टीमले क्रमशः ५ लाख, २ लाख ५० हजार, १ लाख २५ हजार र ७५ हजार नगद पुरस्कार प्राप्त गर्नेछन् । सर्वोत्कृष्ट खेलाडीले २५ हजार नगद पुरस्कार प्राप्त गर्दा विधागत ५ उत्कृष्ट खेलाडी र उत्कृष्ट प्रशिक्षकलाई जनही १० हजार नगद पुरस्कार प्रदान गरिने छ ।

प्रतियोगिता आयोजना गर्न करीब ४० लाख रुपैयाँ खर्च हुने बताइएको छ । आयोजकले ५०/५० प्रतिशत रकम व्यहोर्ने छन् । प्रतियोगिता आयोजनाको मुख्य उद्देश्यमध्ये एक न्यु डायमन्डको भलिबल कोर्ट निर्माण गर्न सहयोग जुटाउनु पनि हो ।

नगद पुरस्कार प्राप्त गर्ने टीमले २० प्रतिशत न्यु डायमन्डलाई उपलब्ध गराउनुपर्ने प्रावधान रहेको छ । टिकटको शुल्क नराखिए पनि दर्शकले कोर्ट निर्माणका लागि आफ्नो इच्छा अनुसार सहयोग गर्न पाउने छन् । ४ दिने प्रतियोगितका खेल कीर्तिपुरस्थित कभर्ड हलमा हुनेछन् ।