नेपाल उद्योग वाणिज्य महासंघका अध्यक्ष शेखर गोल्छाले सरकारले चलचित्र निर्माता व्यवसायीलाई प्रोजेक्ट कर्जा दिने सुविधा दिनुपर्ने बताएका छन् ।

मंगलवार उद्योग वाणिज्य महासंघको चलचित्र तथा मनोरञ्जन फोरम र नेपाल चलचित्र निर्माता संघले आयोजना गरेको चलचित्र गीत संगीतको सरोकार, कानून र करको अधिकार विषय कार्यक्रममा बोल्दै अध्यक्ष गोल्छाले यस्तो बताए ।

उनले चलचित्र निर्माताहरूले घर धितो राखेर ऋण लिएर चलचित्र निर्माण गर्दा निकै ठूलो क्षति भोग्नुपरेको बताए । अध्यक्ष गोल्छाले उद्योग वाणिज्य महासंघले प्रोजेक्ट कर्जा चलचित्र निर्माता, साना र मझौला उद्योगहरूका लागि समेत माग गरेको बताए । उनले कोरोना महामारीका कारण भएको बन्दाबन्दी र निषेधाज्ञाको अवधिको विद्युत् महशुल पूर्णरूपमा छुट तथा पुनः कर्जा उपलब्ध गर्ने कागजात प्रक्रियागत हुने झन्झटलाई सहज वातावरणको व्यवस्था गर्न सरकारसँग माग गरे ।

अध्यक्ष गोल्छाले नेपाल प्राकृतिक सुन्दरताले भरिएको भन्दै आन्तरिक मात्रै नभएर अन्तर्राष्ट्रिय सिनेमा छायांकनको लागि समेत आकर्षणको केन्द्र बन्नसक्ने बताए ।

उनले भने, ‘प्राकृतिक सुन्दरताले भरिएको नेपाल आन्तरिक मात्रै होइन, अन्तर्राष्ट्रिय सिनेमा छायांकनको लागि समेत आकर्षणको केन्द्र बन्नसक्छ तर चलचित्र छायांकनका लागि खुला गरिएका क्षेत्रमा समेत छायांकनमा समस्या खडा गरिएको गुनासो अहिले पनि बाक्लै आएका छन् । समस्याहरू धेरै छन् । सरकारले घोषणा गरेका नीति तथा कार्यक्रमहरू शतप्रतिशत रूपमा कार्यान्वयन हुन सके मात्रै हदैसम्म समस्या समाधान हुने विश्वास रहेको छ । घोषणा गरेका नीति तथा कार्यक्रम सही रूपमा कार्यान्वयन गर्नुपर्छ । चलचित्रले हाम्रो सोचलाई प्रभावित बनाएको हुन्छ । राज्यप्रति मानिसहरूको सद्भाव र प्रेम हुन्छ, त्योे चलचित्रको माध्यमबाट उठेको हुन्छ । त्यसकारण चलचित्रको विकास एकदमै आवश्यक छ । हामी सामाजिक प्राणी हौं । चलचित्रमा देखाएका धेरै कुराहरूबाट प्रभावित भएर सोच परिवर्तन  गर्ने भएकाले चलचित्रको विकास आवश्यक छ ।’