बागमती प्रदेशको बजेट पारित

बागमती प्रदेश सरकारले आर्थिक वर्ष २०७९÷८० का लागि प्रस्तुत गरेको बजेट बहुमतले पारित भएको छ । प्रदेश सभाको बिहीवार बसेको बैठकले आर्थिक मामिला तथा योजनामन्त्री शालिकराम जम्मकट्टेलले असार १ मा प्रस्तुत गरेको बजेट बहुमतले पारित गरेको हो । 

बैठकमा सभामुख सानुकुमार श्रेष्ठले मन्त्री जम्मकट्टेललाई उक्त बजेटसम्बन्धी प्रस्ताव पेस गर्न अनुमति दिएका थिए । प्रदेश सरकारले आगामी आवका लागि कूल रु ७० अर्ब ९३ करोड अनुमानित बजेट प्रस्ताव गरेको थियो थियो ।

कूल रु ७० अर्ब ९३ करोड बजेटमध्ये चालुतर्फ रु १९ अर्ब दुई करोड, पुँजीगततर्फ रु ४१ अर्ब ५६ करोड, वित्तीय हस्तान्तरणतर्फ रु आठ अर्ब र वित्तीय व्यवस्थापनतर्फ रु दुई अर्ब बजेट विनियोजन गरिएको थियो ।

बिहीवारको बैठकमा प्रदेश सरकारको विनियोजन विधेयक र अर्थसम्बन्धी प्रस्तावलाई कार्यान्वयन गर्न बनेको विधेयक, २०७९ माथि छलफल भएको थियो । बैठकले अर्थसम्बन्धी प्रस्तावलाई कार्यान्वयन गर्न बनेको विधेयक २०७९  पनि पारित गरेको छ ।

बैठकमा विभिन्न मन्त्रालय र निकायहरूको बजेटका शीर्षकहरूमाथि १९ सांसदहरूले खर्च कटौतीको प्रस्ताव गरेका थिए । खर्च कटौतीको प्रस्ताव गर्नेहरुमा विवेकशील साझा पार्टी बागमती प्रदेश संसदीय दलका नेता रमेश पौड्याल, नेमकिपा बागतमी प्रदेश संसदीय दलका नेता सुरेन्द्रराज गोसाइ, नेमकिपाकी सिर्जना सैँजु, विवेकशील साझाकी शोभा शाक्य, राप्रपाकी रीना गुरुङ, नेकपा (एमाले)की गोमा भुर्तेल, आशामाया तामाङ, विनोदकुमार खड्का, नारायणप्रसाद सिलवाल, दीपक निरौला, सरस्वती बस्नेत, मैना अछामी, राजेश शाक्य, बेलीमाया घले, प्रकाश श्रेष्ठ, रामेश्वर फुँयाल, सरेश नेपाल र सीता लामा थिए । 

बजेट पारित भएपछि मुख्यमन्त्री फेर्ने चलखेल 

प्रदेश सभामा आगामी आवको बजेट पारित भएलगत्तै मुख्यमन्त्री परिवर्तनको चलखेल सुरु भएको छ । पाँच दलीय गठबन्धनको संयुक्त सरकारका मुख्यमन्त्री राजेन्द्र पाण्डेलाई विस्थापित गरी नयाँ मुख्यमन्त्री छान्ने प्रयास सुरु भएको हो । वर्तमान सरकार गठनका बेला नेकपा एकीकृत समाजवादी र नेपाली कांग्रेसबीच आलोपालो सरकारको नेतृत्व गर्ने सहमति भएको भन्दै सोही अनुसार मुख्यमन्त्री फेर्ने प्रयास थालिएको हो ।

दुई दलबीच पाण्डेले ६ महिना र त्यसपछि कांग्रेस संसदीय दलका नेता ईन्द्र बानियाँले प्रदेश सरकारको नेतृत्व गर्ने सहमति भएको थियो । सहमति अनुसार पाण्डेले सरकारको नेतृत्व छाड्ने संकेत नदेखिएपछि कांग्रेस र नेकपा माओवादी केन्द्रका सांसदहरूले हस्ताक्षर समेत संकलन गरेका छन् । उनीहरुले पाण्डेविरुद्ध अविश्वासको प्रस्ताव दर्ता गर्नका लागि हस्ताक्षर संकलन गरेका हुन् ।  

मुख्यमन्त्री पाण्डे गत कात्तिकमा मुख्यमन्त्री पदमा निर्वाचित भएका थिए । उनी नेकपा एमालेको विभाजन पनि गठन भएका नेकपा (एस)तर्फ लागेका थिए । उनी कांग्रेस, माओवादी केन्द्रलगायतका गठबन्धन दलका प्रदेश सभा सदस्यहरुको समर्थनमा मुख्यमन्त्री बनेका थिए ।

सहमति अनुसार ६ महिनाको समय पहिले नै सकिए पनि कांग्रेस माओवादीले बजेट पारित हुने समय पर्खेर बसेको थियो । बिहीवार प्रदेश सभामा बजेट पारित भएलगत्तै उनीहरूले हस्ताक्षर संकलन गरेका हुन् ।  

याे पनि..

बागमतीका मुख्यमन्त्री पाण्डेविरुद्ध हस्ताक्षर संकलन गर्दै कांग्रेस र माओवादी