नेपाली कांग्रेस र नेकपा (माओवादी केन्द्र) का सांसदले हस्ताक्षर नै संकलन गरेपछि सत्ता गठबन्धनमा खटपट आएको ठानिएका बेला बाग्मती प्रदेशका मुख्यमन्त्री राजेन्द्र पाण्डेले केन्द्रमा सहमति भए आफू बाधक नबन्ने संकेत गरेका छन् ।

सामाजिक सञ्जाल ट्विटरमार्फत प्रतिक्रिया दिँदै पाण्डेले केन्द्रको सहमति र गठबन्धनको स्प्रीटअनुसार अगाडि बढ्ने उल्लेख गरेका हुन् ।

‘बागमती प्रदेशमा सरकार परिवर्तनसँग जोडेर आएका प्रश्नहरूको निरूपण पाँचदलीय गठबन्धनको केन्द्रीय बैठकबाटै हुनेछ । गठबन्धनको मूल स्पिरिट कायम रहने गरी आगामी कदम तय हुनेछन्,’ पाण्डेले ट्वीट गरेका छन् ।

मुख्यमन्त्री बन्ने समयमा भएको सहमति कार्यान्वयनमा पाण्डे राजी नभएको भन्दै कांग्रेस र माओवादी केन्द्रका सांसदले बिहीवार हस्ताक्षर संकलन गरेका थिए । 

नेकपा एसकी प्रभावशाली नेतृ मुनु सिग्देलले कांग्रेस र माओवादीका सांसदहरूले गरेको हस्ताक्षर अविश्वासको प्रस्तावका लागि नभएको दाबी गरिन् । 

‘भोलि नयाँ सरकार बन्यो भने त्यसका लागि हस्ताक्षर चाहिन्छ भनेर संकलन गर्नुभएको बुझेका छौं, अविश्वास प्रस्तावका लागि होइन,’ सिग्देलले लोकान्तरसँग भनिन्, ‘केन्द्रमा सहमति भयो भने मुख्यमन्त्री बाधक बन्नु हुन्न ।’

पाण्डे मुख्यमन्त्री बन्ने समयमा आधा-आधा कार्यकाल बाँड्ने सहमति गरेका थिए । स्थानीय तहको चुनावलगत्तै कांग्रेसका इन्द्र बानियाँलाई मुख्यमन्त्री बनाउने सहमति भएको थियो । पाण्डे २०७८ कात्तिक ११ गते मुख्यमन्त्री बनेका थिए । 

बागमती प्रदेश सभामा नेकपा माओवादीका एक नेताले पाण्डेले मुख्यमन्त्री छाड्न आनाकानी गरेकाले हस्ताक्षर संकलन गर्नु परेको बताए ।

‘नेकपा एसका नेताहरूमा पद त्याग्न मुश्किल परेको देखियो, केन्द्रको पुनरावृत्ति प्रदेशमा पनि हुने हो कि भनेर हस्ताक्षर गर्नुपर्ने बाध्यता आइपर्‍यो,’ ती नेताले भने । 

नेपाली कांग्रेसका नेताहरूले भने मुख्यमन्त्रीविरुद्ध शुरू गरिएको हस्ताक्षरले गठबन्धनमा असर नपर्ने दाबी गरे ।

‘हाम्रै जोडबलले उहाँ मुख्यमन्त्री बन्नुभएको हो । अष्टलक्ष्मी शाक्यविरुद्ध अविश्वास प्रस्ताव ल्याउने बेलामै आलोपालो सरकारको सहमति भएको हो,’ बागमती प्रदेशका एक कांग्रेस सांसदले भने । 

मुख्यमन्त्रीविरुद्ध अविश्वासको प्रस्ताव आउनुअगावै पाण्डेले राजीनामा गर्ने नेकपा एस स्रोतले बतायो । 

‘चुनावमा गठबन्धन गरेर जाने तयारी भएका बेला गठबन्धनबाटै अविश्वासको प्रस्ताव ल्याउनुपर्ने अवस्था आउँदैन,’ एसका एक नेताले भने ।