नेपाली कांग्रेसको संस्थापन इतरका नेता डा. शेखर कोइराला पक्षको भेला काठमाडौंमा शुरू भएको छ । 

महाधिवेशनको ६ महिनाको समीक्षा, नेतृत्वविहीन भ्रातृ संगठनको अधिवेशनलगायत विषयमा छलफल गर्न बैठक बसेको हो । 

बत्तीसपुतलीस्थित अनुपम फूडल्यान्डमा बिहीवार अपराह्न भेला शुरू भएको हो । भेलामा नेता कोइराला, महामन्त्री गगन थापालगायत सहभागी छन् । 

काठमाडौं उपत्यकामा उपलब्ध नेताहरूको भेलाले सभापति शेरबहादुर देउवामाथि विभागहरू गठन गर्न दबाब बढाउने ती नेताले बताए । 

महाधिवेशन सम्पन्न भएको ६ महिना पुग्दा समेत विभागहरू गठन नगरिएको, भ्रातृ संगठन पदाधिकारीविहीन बनेको र आफ्नो समूहका नेतालाई जिम्मेवारी नदिइएकोमा संस्थापनइतर पक्ष असन्तुष्ट छ । 

शेखरपक्षीय भेलाले गत स्थानीय तह चुनावको समीक्षा गर्दै प्रतिनिधि सभा र प्रदेश सभा चुनावमा तालमेल गर्ने या नगर्ने भन्नेबारे पनि निचोड निकाल्ने नेताहरूले बताएका छन् ।

यो समूहका अधिकांश नेताहरू चुनावमा तालमेलको विपक्षमा देखिएका छन् ।