नेपाली कांग्रेसको निर्वाचन केन्द्रीय परिचालन समितिले स्थानीय तह निर्वाचन २०७९ को समीक्षा गरी तयार गरिएको प्रतिवेदन पारित गरेको छ ।

बिहीवार पार्टी केन्द्रीय कार्यालय सानेपामा बसेको समितिको बैठकले स्थानीय तह निर्वाचन २०७९ को समीक्षा गरी समितिले तयार पारेको प्रतिवेदन पारित गरेको हो ।

बैठकमा पार्टीका केन्द्रीय सदस्य तथा समितिका सदस्यले प्रतिवेदनका विषयमा विभिन्न सुझावहरू दिएका नेपाली कांग्रेस स्थानीय तह निर्वाचन परिचालन समिति सचिवालयकी संयोजक नानु बाँस्तोलाले जानकारी दिइन् । आवश्यक सुझाव समेटेर प्रतिवेदन कांग्रेसको केन्द्रीय कार्यसमिति बैठकमा पेश गर्ने निर्णय भएको पनि उनले बताइन् ।

उनले भनिन्, ‘नेपाली कांग्रेस स्थानीय तह निर्वाचन केन्द्रीय परिचालन समितिको आजको बैठक सम्पन्न भएको छ । बैठकमा स्थानीय तह निर्वाचनको विषयमा समीक्षा गरिएको छ र आजको बैठकमा नेपाली कांग्रेस स्थानीय तह निर्वाचन परिचालन समितिले प्रतिवेदन तयार पारेको थियो । त्यो प्रतिवेदनको विषयमा आन्तरिक छलफल गरेर हामीले प्रतिवेदनलाई पास गरेका छौं । अधिकांश बोल्ने सदस्यज्यूहरू केन्द्रीय सदस्यहरू हुनुहुन्छ । विभिन्न भातृ संघ तथा शुभेच्छुक संघ, संस्थाका प्रतिनिधिहरू पनि समावेश हुनुहुन्छ यो केन्द्रीय निर्वाचन परिचालन समितिमा । आदरणीय पूर्णबहादुर खड्काज्यूको संयोजकत्वमा बनेको समिति हो । अधिकांश बोल्ने वक्ताहरूले प्रतिवेदनमा समावेश गर्नुपर्ने अन्य समावेश नभएका सुझावहरू दिनुभएको छ । त्यो सुझावलाई आगामी दिनमा समावेश गरेर प्रतिवेदन तयार गर्ने र त्यसपछि नेपाली कांग्रेसको केन्द्रीय कार्यसमितिको बैठकमा लगेर बैठकमा पनि जानकारी गराउने भन्ने आजको निर्णय भएको छ । प्रतिवेदनमा ७७ वटै जिल्लामा स्थानीय तह निर्वाचनमा के–कस्तो अवस्थामा रह्यो र अहिले हेर्दाखेरी हामी प्रदेशमा पनि पहिलो पार्टी बनेका छौं । त्यो विषयमा समावेश गरिएको छ । गठबन्धनका दलहरूसँग निर्वाचनमा भएका कमी, कमजोरी के भए र फाइदा हामीलाई के भयो के भएन भन्ने समावेश गरिएको छ । यो विषय छलफलकै रूपमा छ । उपसमितिहरूले पनि आ–आफ्नो प्रतिवेदन पेश गरेको । त्यसलाई पनि समितिको प्रतिवेदनमा समावेश गरिएको छ ।’