संयुक्त राज्य अमेरिकाको भ्रमणमा रहेका प्रधानसेनापति प्रभुराम शर्माले संयुक्त राष्ट्र संघका सुरक्षा अधिकारीहरूसँग भेट गर्ने भएका छन् ।

असार १३ गते अमेरिकाको भ्रमणका लागि त्यसतर्फ प्रस्थान गरेका प्रधानसेनापति शर्मासहितको टोलीले शुक्रबार न्यूयोर्कस्थित राष्ट्र संघको मुख्यालयको भ्रमण गर्ने र सोही क्रममा राष्ट्रसंघका उच्च सुरक्षा अधिकारीहरूसँग भेट गर्ने कार्यक्रम तय भएको नेपाली सेनाले विज्ञप्तिमार्फत् जानकारी दिएको छ । 

प्रधानसेनापति शर्माले यसअघि अमेरिकाका उच्च सुरक्षा अधिकारीहरूसँग भेटघाट गरेका थिए । उनले जोइन्ट चिफ अफ स्टाफ एड्मिरलका उपाध्यक्ष क्रिष्टोफर ग्रेडी, डेपुटी असिस्टेन्ट अफ डिफेन्सका दक्षिणपूर्वी  एसिया हेर्ने अधिकारी लिन्ड्से फोर्स, अमेरिकी सेनाका चिफ अफ स्टाफ अफ द आर्मीका प्रमुख जेम्स चार्लीलगायतसँग भेटघाट गरेका थिए । 

उक्त भेटघाटका क्रममा नेपाल र अमेरिकाबीचको सैनिक सम्बन्ध तथा दुई देशबीच रही आएको पारस्पारिक सम्बन्ध एवं हितका विषयमा कुराकानी भएको सेनाले जनाएको छ ।