सूचना तथा सञ्चार प्रविधि क्षेत्रको प्रतिष्ठित अवार्डको रूपमा परिचित आइसिटी अवार्डको सातौँ संस्करणको अनलाइन नोमिनेसन (आवेदन) खुला गरिएको छ । 

लिभिङ विथ आइसिटीको आयोजना र विभिन्न राष्ट्रिय तथा अन्तराष्ट्रिय संस्थाहरूको सहकार्यमा आयोजनामा हुन लागेको ‘आइसिटी अवार्ड २०२२’ को नोमिनेसन शुक्रवारदेखि शुुरु भएको हो । सन् २०१६ बाट शुरु भएको आइसिटी अवार्ड हरेक वर्ष परिस्कृत र विस्तारित रूपमा आयोजना हुँदै आइरहेको आयोजकको दाबी छ ।

विभिन्न ११ विधाहरूमा खुला गरिएको र अनलाइन नोमिनेसन साउन ३१ गतेसम्म जारी रहने आयोजक समितिका अध्यक्ष राजन लम्सालले बताए । उनका अनुसार, आइसिटी अवार्डमा प्रतिस्पर्धी आफैँ वा अन्य कसैले अनलाइन नोमिनेसन दर्ता गर्न सक्नेछन् । अवार्डमा नोमिनेसन गर्न आइसिटी अवार्ड डटओआरजी मा गएर विधा छनौट गरी अनलाइन फारम भरेर बुझाउनुपर्ने छ ।

आइसिटी अवार्ड २०२२ को ग्राण्ड फिनाले मंसिरमा आयोजना हुनेछ । यो ६ महिनाको समय अवार्डलाई हरेक किसिमले उत्कृष्ट र पारदर्शी बनाउन आयोजकले ५ भन्दा बढी चरणमा छनोट प्रकृयालाई अगाडि बढाउनेछ । १२ जना विज्ञ जुरी समिति र १३ जना विशिष्ट सल्लाहकार समिति रहेको यस अवार्डमा प्रिजेन्टेशन, स्पिड डेटिङ, पब्लिक भोटिङ लगायत उत्कृष्ट ५ को लागि ‘फिल्ड भिजिट’ समेत सञ्चालन हुनेछ । 

यि हुन् आइसिटी अवार्ड २०२२ का ११ विधाहरू 

१. स्टार्टअप आइसिटी अवार्ड 

आइटी प्रडक्ट, सर्भिस तथा इन्नोभेसन क्षेत्रमा काम गरिरहेका कम्पनीहरूलाई प्रवद्र्धन र प्रोत्साहन गर्ने यो अवार्डमा सहभागी हुन नेपालको प्रचलित कानूनअनुसार कम्पनी दर्ता भएर सञ्चालनमा रहेको हुनुपर्नेछ । यस विधामा विगत ४ वर्षको अवधिमा दर्ता भएका कम्पनीहरूले आवेदन दिन सक्नेछन् । 

२. प्रडक्ट आइसिटी अवार्ड 

आइसिटी प्रडक्ट अवार्डमा कुनै नेपाली कम्पनी, संस्था, समूह  वा व्यक्तिले विकास गरेको आइटी तथा इन्नोभेटिभ प्रडक्टलाई नोमिनेसन दर्ता गराउन सकिनेछ । २०७८ सालमा सार्वजनिक भएका आइटी प्रडक्टहरूलाई लिएर यस विधामा नोमिनेसन दर्ता गर्न सकिन्छ ।

३. राइजिङ स्टार इन्नोभेसन आइसिटी अवार्ड 

राइजिङ स्टार इन्नोभेसन आइसिटी अवार्डमा कलेज तथा विश्वविद्यालयका विद्यार्थीहरू तथा ३० वर्ष मुनिका युवाले तयार गरेका रिसर्च, इन्नोभेसन तथा प्रोजेक्टहरूलाई लिएर नोमिनेसन दर्ता गर्न सकिनेछ । 

४. पायोनियर आइसिटी अवार्ड 

यो अवार्ड सूचना तथा सञ्चार प्रविधि क्षेत्रमा विशिष्ट योगदान दिएका अग्रज व्यक्तिलाइ प्रदान गरिन्छ । यस विधामा आफैँ वा अरु कसैले योग्य व्यक्तिको नाममा नोमिनेसन दर्ता गर्न सकिनेछ । 

५. नेपाली डायस्पोरा आइसिटी अवार्ड 

नेपाली मूलका व्यक्ति, जो विदेशमा बसेर पनि देशको सूचना प्रविधिको क्षेत्रमा दिइरहेको योगदानलाई उच्च कदर गर्दै यो अवार्ड दिइनेछ । यस विधामा आफू वा अन्य कसैले योग्य व्यक्तिको नाममा नोमिनेसन दर्ता गर्न सकिन्छ । 

६. आन्टरप्रेनर आइसिटी अवार्ड 

आन्टरप्रेनर आइसिटी अवार्ड सूचना प्रविधि क्षेत्रमा क्रियाशील नेपाली उद्यमीलाई दिइनेछ । यस विधामा आफू वा अन्य कसैले योग्य व्यत्तिको नाममा नोमिनेसन दर्ता गर्न सकिन्छ ।

७. वुमन आइकन आइसिटी अवार्ड 

वुमन आइकन आइसिटी अवार्ड सूचना प्रविधि क्षेत्रमा क्रियाशील नेपाली महिलाहरूका लागि लक्षित छ । यस विधामा आफू वा अन्य कसैले योग्य व्यक्तिको नाममा नोमिनेसन दर्ता गर्न सकिन्छ ।

८. डिजिटल एजुकेशन आइसिटी अवार्ड (पल्लिक सेक्टर)

डिजिटल एजुकेशन आइसिटी अवार्ड शिक्षा क्षेत्रलाई डिजिटल तथा प्रविधिमैत्री बनाउन प्रोत्साहन गर्ने उद्देश्यले सरकारी तथा सामुदायिक शैक्षिक संस्थानलाई प्रदान गरिन्छ । यस विधामा संलग्न व्यक्ति वा अन्य कसैले योग्य शैक्षिक संस्थाको नाममा नोमिनेसन दर्ता गर्न सकिन्छ ।

९. डिजिटल एजुकेशन आइसिटी अवार्ड (प्राइवेट सेक्टर)

यस वर्ष निजी क्षेत्रका शैक्षिक संस्थाहरूलाई पनि प्रोत्साहन गर्ने उद्देश्यले डिजिटल एजुकेशन आइसिटी अवार्ड (प्राइवेट सेक्टर) विधा थपिएको छ । यस विधामा संलग्न व्यक्ति वा अन्य कसैले योग्य शैक्षिक संस्थाको नाममा नोमिनेसन दर्ता गर्न सकिन्छ ।

१०. डिजिटल गभर्नेन्स आइसिटी अवार्ड 

यस विधामा सरकारी सेवा तथा सुविधालाई डिजिटलिकरण गर्र्दै नागरिकलाई प्रविधिमैत्री सेवा दिन सफल सरकारी सस्था, निकाय, विभाग वा पालिकाहरूले नोमिनेसन दर्ता गर्न सक्नेछन । यस विधामा संलग्न व्यक्ति वा अन्य कसैले योग्य सरकारी संस्थाको नाममा नोमिनेसन दर्ता गर्न सकिन्छ ।

११. डिजिटल सर्भिसेस आइसिटी अवार्ड

यस विधामा निजी क्षेत्रका संस्था, लिमिटेड वा सर्वसाधारणलाई डिजिटल सेवा दिइरहेका कम्पनीहरूले नोमिनेसन दर्ता गर्न सक्नेछन् । यसै वर्ष थपिएको यस विधामा आइटी तथा सफ्टवेयर कम्पनीहरू बाहेक अन्य सेवामूलक निजी क्षेत्रका कम्पनीहरू यसमा सहभागी हुन सक्नेछन् । यस विधामा संलग्न व्यक्ति वा अन्य कसैले योग्य शैक्षिक संस्थाको नाममा नोमिनेसन दर्ता गर्न सकिन्छ ।