अर्थमन्त्रीका वरिष्ठ आर्थिक सल्लाहकार डा. सुरेन्द्र उप्रेतीले बैंकिङ तरलता र भुक्तानी सन्तुलनमा भएको घाटाले अर्थतन्त्रमा समस्या आएको बताएका छन् । 

शुक्रवार काठमाडौंमा आयोजित नेपालको वर्तमान आर्थिक अवस्था विषयक अन्तरक्रिया कार्यक्रममा बोल्दै डा.उप्रेतीले यस्तो बताएका हुन् । उनले पछिल्लो समय बैंकिङ कर्जा विस्तार १९ प्रतिशतले र निक्षेप ५ प्रतिशतको वृद्धि रहेको बताए । 

डा.उप्रेतीले कोरोना महामारीपछि अत्याधिक रुपमा वस्तु आयात भएकाले भुक्तानी सन्तुुलनमा घाटा भइरहेको पनि बताए । 

उनले पछिल्लो ७ महिनादेखि लगातार विदेशी मुद्रा सञ्चिति गिरावट भइरहे पनि सरकारले आयात नियन्त्रण नीति लिएका कारण नियन्त्रणमा रहेको बताए । 

‘अब जुनसुकै सरकार आए पनि अबको तीन/चार वर्षसम्म विदेशी मुद्रा सञ्चितिमा दबाब रहन्छ । तर गर्न सक्ने काम प्रशस्त छ, त्यस्तो काम गर्न सरकार कम्मर कसेर लाग्छ,’ उनले भने । 

त्यस्तै अर्थविद् डा. गोविन्द नेपालले मुलुकको अर्थतन्त्र संकटमा रहेको अझै थप संकटहरू बढ्दै जाने बताएका छन् । उनले संकट भन्दैमा श्रीलंकाको जस्तो अवस्थामा भने नपुग्ने बताए । 

अर्थविद् डा. नेपालले बजेट कार्यान्वयन हुनेमा शंका व्यक्त गरे ।