नेकपा एमालेका सांसद नवराज सिलवालले लोकप्रियताका लागि बढी सामाजिक सुरक्षा भत्ता बाँड्दा राष्ट्रले धान्न नसक्ने अवस्था आउने हो कि भन्नेतर्फ सचेत गराएका छन् ।

उनले श्रम गर्नसक्ने एकल महिलाहरूलाई भत्ता दिनुभन्दा आयआर्जनका काममा लाग्न राज्यले प्रेरित गर्नुपर्ने बताए ।

शुक्रवार प्रतिनिधिसभा अन्तर्गतको राज्य व्यवस्था तथा सुशासन समितिको बैठकमा ‘सामाजिक सुरक्षा ऐन २०७५ लाई संशोधन गर्न बनेको विधेयकमाथिको छलफल’मा बोल्दै उनले कुनै श्रममा तथा आयआर्जनमा नजोडिएका एकल महिलालाई मात्र भत्ता दिनुपर्ने धारणा राखे ।

उनले भने, ‘जो सक्षम छ । जो एकल छ, ऊ कमाउँछ । श्रम गर्नसक्छ । पढेको छ । भनेसी उसलाई भत्ता पाएर अल्छी बनाएर राख्ने कि आर्जन गर्नका लागि, अवसरको लागि पनि प्रेरित गर्ने राज्यले । सक्षम, योग्य छ भने उसले भत्तामा बस्ने होइन कि काम गर्न थाल्ने । त्यस्ता खालका महिलाहरु अन्य कुनै श्रमको, आयआर्जनसँग नजोडिएको अवस्थाको भनेर लेखौं ।’