अमेरिकाको अनुसन्धान संस्था एफबीआई र बेलायतको गुप्तचर निकाय एमआई५ का प्रमुखहरूले चीनविरुद्ध जासूसीको आरोप लगाएका छन् । 

लन्डनस्थित एमआई५ को केन्द्रीय कार्यालयमा संयुक्त सम्बोधन गर्दै उनीहरूले पश्चिमका व्यापारिक नेताहरूलाई चेतावनी दिए । चीन सरकारले आफ्नो फाइदाका लागि पश्चिमी व्यापारिक संस्थाहरूको प्रविधि चोर्न खोजेको चेतावनी उनीहरूले दिएका हुन् । 

एफबीआईका निर्देशक क्रिस्टोफर रे र एमआई५ का महानिर्देशक केन मककलमले चीन सरकारबाट हुने गरेको आर्थिक गुप्तचरी तथा ह्याकिङको चर्चा गरेका हुन् । त्यस्तै आफूविरुद्ध विदेशमा उठ्ने आवाजहरू दबाउन चीन सरकारले गरेको प्रयासको उल्लेख पनि उनीहरूले गरे । 

‘चीन सरकारले हाम्रो आर्थिक तथा राष्ट्रिय सुरक्षामा सबभन्दा ठूलो र दीर्घकालीन चुनौती तेर्स्याएको छ,’ रेले बताए ।

त्यस्तै मककलमले चिनियाँ जनमुक्ति सेनासँग सम्बन्ध राख्ने ५० भन्दा बढी चिनियाँ विद्यार्थीहरूले बेलायत छोडेको जानकारी पनि दिए । बेलायत सरकारले एकेडमिक टेक्नोलोजी अप्रुभल स्किममा सुधार ल्याएपछि चिनियाँहरू बेलायतबाट गएको उनको भनाइ छ । 

चिनियाँ कम्युनिस्ट पार्टीले तेर्स्याएको जोखिम बढ्दै गएको स्थितिमा त्यसको प्रतिकारका लागि आफूहरूले कठोर कारवाही गरिरहेको मककलमको भनाइ छ । 

बेलायतका कलेज र विश्वविद्यालयहरूको लगभग डेढ लाख चिनियाँ विद्यार्थीहरू अध्ययनरत छन् । तीमध्ये ५० विद्यार्थीले मात्र बेलायत छोडेका हुन् ।