नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले जनयुद्ध लडेका र नडलेकाबीचको विवादले पार्टी नबन्ने बताएका छन्। उनले जनयुद्ध लडेकामा अहंकार र नलडेकाहरूले आफूलाई वैचारिक भनेर दाबी गर्नु गतल भएको बताए। 

पार्टी केन्द्रीय कमिटी बैठकमा सदस्यहरूले उठाएका प्रश्नको बिहीवार जवाफ दिँदै प्रचण्डले जनयुद्ध लडेको र नलडेकाबीचको विवादले पार्टी कमजोर हुने बताएका हुन्। ‘जनयुद्ध नलड्ने र लड्नेबारे अन्तरविरोध देखिएका छन्।

जनयुद्ध नलड्नेहरू पित्तल होइनन् र जनयुद्ध लड्नेहरूचाहिँ सुन नै होइनन्’ प्रचण्डले भने, ‘जनयुद्ध गर्ने चाहिँ अहंकारी छन् भन्नेहरू छन् हामी पो वैचारिक भन्नेहरू पनि छन्। त्यो पनि पार्टी बनाउने विचार प्रवृत्ति होइनन्।’ 

माओवादी शान्ति प्रक्रियामा आएपछि एकता प्रक्रियामा आएका नारायणकाजी समूहका कार्यकर्ताले आफूहरूमाथि अहिले पनि विभेद गरिएको गुुनासो गर्दै आएका छन्। प्रचण्डले सबैलाई क्षमता अनुसारको जिम्मेवारी दिइने बताए।