कानून, न्याय तथा संसदीय मामिलामन्त्री गोविन्दप्रसाद शर्मा (कोइराला) ले नागरिकतासम्बन्धी विधेयकमा राजनीतिक दलहरू बीचमा सहमति भएका विषय मात्र राखिएको बताएका छन् । 

बुधवार प्रतिनिधि सभा बैठकपछि सञ्चारकर्मीहरूलाई संक्षिप्त प्रतिक्रिया दिँदै मन्त्री शर्माले नागरिकतासम्बन्धी विधेयकलाई सर्वसम्मत बनाउने उद्देश्यले विवाद नभएका विषयहरू मात्रै समेटेर ल्याइएको बताएका हुन् । 

उनले विधेयकमा बुबा, आमा दुवै नेपाली नागरिक भएका सन्तानले नागरिकता पाउने, नेपालमा जन्मिएका नेपाली नागरिक र गैरनेपाली नागरिकका सन्तान नेपालमै बसोबास गरेका छन् भने नागरिकता प्रदान गरिने विषय समेटिएको बताए । 

मन्त्री शर्माले गैरआवासीय नेपालीहरूलाई पनि राजनीतिक अधिकारबाहेकको आर्थिक, सामाजिक र सांस्कृतिक अधिकार दिने गरी विधेयक ल्याइएको स्पष्ट पारे ।