ललितपुरको हात्तीवनमा रोकिराखेको ट्रकमा स्कुटर ठोक्किँदा एक जनाको मृत्यु भएको छ । 

मध्यराति भएको दुर्घटनामा ललितपुरको गोदावरी नगरपालिका ५ लेले घर भई हाल नख्खु बस्दै आएका २० वर्षीय सुरेश मोक्तानको मृत्यु भएको महानगरीय प्रहरी परिसर ललितपुरका एसपी शिद्धिविक्रम शाहले लोकान्तरलाई जानकारी दिए । 

उनका अनुसार रोकिराखेको ट्रकमा स्कुटर ठोक्किएको हो ।  

हात्तीवनस्थित सडक छेउमा रोकी राखेको बागमती प्रदेश-०१-००५ख ९४७५ नम्बरको ट्रकको पछाडि मोक्तानले चलाएको बागमती प्रदेश-०२-००७प ८६३८ नम्बरको स्कुटर गए राति पौने १ बजे ठोकिएको  प्रहरीले जनाएको छ ।

दुर्घटनामा गम्भीर घाइते भएका मोक्तानको उपचारको लागि अस्पताल लैजाँदै गर्दा बाटौमै मृत्यु भएको हो । शवलाई पाटन अस्पताल राखिएको प्रहरीले जनाएको छ ।

दुवै सवारी साधन र ट्रक चालकलाई नियन्त्रणमा लिएर अनुसन्धान गरिरहेको प्रहरीको भनाइ छ ।