नेपाली कांग्रेसकी पुष्पा भुसालले उपसभामुख पदमा उम्मेदवारी दर्ता गराएकी छन् । सत्तारुढ पाँच दलीय गठबन्धनको तर्फबाट कांग्रेसकी भुसालले उम्मेदवारी दर्ता गराएकी हुन् । उनको प्रस्तावकमा नेकपा माओवादी (केन्द्र)का प्रमुख सचेतक देव गुरुङ छन् भने समर्थक नेकपा (एकीकृत समाजवादी)की लक्ष्मीकुमारी चौधरी रहेकी छन् । 

उनले संघीय संसदको ल्होत्से हलमा रहेको निर्वाचन कार्यालयमा पुगेर उम्मेदवारी दर्ता गराएकी हुन् । 

प्रमुख प्रतिपक्ष दल नेकपा एमालेले भने हालसम्म उम्मेदवारको टुंगो लगाउन सकेको छैन । लामो समयदेखि रिक्त रहेको उपसभामुख पदमा निर्वाचन गर्न संघीय संसद सचिवालयले बुधवार निर्वाचन कार्यक्रम प्रकाशित गरेको थियो । कार्यक्रमअनुसार बिहीवार बिहान ११ बजेदेखि दिउँसो १ बजेसम्म मनोनयन दर्ताको समय राखिएको छ । 

मतदान भने शुक्रवार हुनेछ ।