चन्द्रागिरि नगरपालिकाले फोहर व्यवस्थापनमा काठमाडौं महानगरपालिकालाई सहयोग गर्ने प्रतिबद्धता जनाएको छ । 

काठमाडौं उपत्यकाभित्रको ठूलो क्षेत्रफल भएका ती पालिकाकाका प्रमुखका बीचमा शनिवार पहिलोपटक आपसी संवादसमेत भएको छ ।

काठमाडौं महानगरपालिकाले आइतवारदेखि कुहिने र नकुहिने फोहर अलग–अलग संकलन गर्न सुरुआत गर्दैछ । ‘स्रोतमा नै फोहर नमिसाउने’ अभियानअन्तर्गत काठमाडौंले आइतबार र बुधबार कुहिने तथा सोमबार र शुक्रबार नकुहिने फोहर संकलन गर्न लागेको हो । जनचेतना जगाउन उसले घरदैलो अभियान जारी राखेको छ ।

चन्द्रागिरिका प्रमुख घनश्याम गिरी र काठमाडौंका मेयर बालेन्द्र साहबीच शनिवार चन्द्रागिरि नगरपालिकामा भएको भेटवार्तामा फोहर व्यवस्थालगायत अन्य क्षेत्रमा सहकार्य गर्दै जाने विषयमा छलफल भएको छ । छलफलमा प्रमुख गिरीले फोहर व्यवस्थापन साझा समस्या भएकाले काठमाडौं महानगरपालिकाले अवलम्बन गरेको नीतिलाई सधैँ साथ र सहयोग गर्ने प्रतिबद्धता जनाएका थिए । ‘सकेसम्म नगर क्षेत्रबाट उत्पन्न हुने फोहर नगरपालिकाभित्रै व्यवस्था गर्ने नीति लिएका छौँ,’ उनले भने । 

चन्द्रागिरिले कुहिने फोहरबाट कम्पोष्ट मल बनाई आयआर्जनको माध्यम बनाउन निजी क्षेत्रलाई नगरपालिकाले उत्प्रेरणा दिइरहेको उनले जानकारी दिए । फोहर व्यवस्थामा काठमाडौं उपत्यकाका नगरपालिका बीचमा एकीकृत नीतिका साथ सहकार्य आवश्यक रहेको उनको भनाइ छ । उनले कुहिने र नकुहिने फोहर अलग–अलग संकलन गर्न विद्यालय, धार्मिक संघसंस्था, गुठीका साथ जनप्रतिनिधिलाई परिचालन गरिने जानकारी दिए । 

काठमाडौंका प्रमुख साहले महानगरपालिकाले साउन १ गतेदेखि फोहर व्यवस्थाअन्तर्गत कुहिने र नकुहिने फोहर अलग–अलग संकलन गर्न सुरुआत गर्न लागेको जानकारी दिँदै महानगरसँग जोडिएका अन्य नगरपालिकामा पनि यही यसरी नै फोहर सङकलन गर्न आग्रह गरे । 

उनले फोहर व्यवस्था गर्न विकेन्द्रित नीति आवश्यक रहेकोमा जोड दिएका छन् । ‘उपत्यकाका फोहर व्यवस्थापन मानसिक समस्या हो । यसको दीर्घकालीन समाधान खोजिनुपर्छ । यसका लागि मैले प्राथमिकताका साथ काम गरेको छु,’ उनले भने । रासस