नेकपा एमालेका अध्यक्ष केपी शर्मा ओलीले स्थानीय चुनावमा पार्टीभित्र शर्मनाक अन्तर्घात भएको गुनासो गरेका छन् । 

पार्टीविरुद्ध चौतर्फी घेराबन्दी भइरहेको समयमा पार्टी भित्रबाट अन्तर्घातका कारण स्थानीय चुनावमा अपेक्षित नतिजा आउन नसकेको बताएका हुन् । 

बागमती प्रदेश कमिटीले आयोजना गरेको प्रशिक्षण कार्यक्रमलाई बुधवार काठमाडौंमा सम्बोधन गर्दै ओलीले टिकट पाए जित्छु नपाए जिताउँछु भन्ने नारा व्यवहारमा उल्टो सावित भएको बताएका हुन् । 

‘हाम्रो पार्टीको एउटा वडा कमिटी ३९ जनाको रहेछ, त्यहाँ पार्टीका शुभेक्षुकको पनि थिए होला, वडाको चुनावमा भोट २४ आयो । हामीलाई पार्टी सदस्य हौं भन्न लाज हुनुपर्छ कि पर्दैन ? यो भन्दा बेइमानी, निकृष्टता र शर्मनाक कुरा केही हुन्छ ? पार्टीको वडा कमिटी मात्र ३९ जनाको, भोट हाल्छ २४,’ ओलीले भने, ‘चुनावको बेला एउटा नारा चलेको थियो, टिकट पाए जित्छु– नपाए जसले पाउँछ उसलाई जिताउँछु । यो नारा विल्कुल ठिक थियो, व्यवहारमा उल्टो भयो ।’