जनता समाजवादी पार्टी (जसपा)ले कारबाही गरेपछि छुट्टै दल गठनको तयारीमा रहेका डा. बाबुराम भट्टराईले समावेशी लोकतान्त्रिक पार्टीका नेताहरूसँग छलफल गरेका छन् । छुट्टै दल गठनको तयारीमा रहेका उनले बिहीवार उक्त पार्टीका नेताहरूसँग छलफल गरेका हुन् । डा. भट्टराईले उक्त पार्टीका अध्यक्ष दीपक लामिछानेलगायतका नेताहरूसँग भेट गरेको उनको सचिवालयले जनाएको छ । 

नेकपा माओवादी केन्द्रबाट अलग भएपछि डा.भट्टराईले चुनाव चिह्न आँखा राखेर नयाँ शक्ति पार्टी गठन गरेका थिए । २०७४ मा उनले सोही निर्वाचन चिह्नबाट निर्वाचनमा भाग लिएका थिए । तर, जसपासँग एकीकृत भएपछि उनको निर्वाचन चिह्न राखेर लामिछानेले समावेशी लोकतान्त्रिक पार्टी गठन गरेका थिए । 

त्यसबेला डा.भट्टराईकै निर्देशनमा लामिछानेले उक्त दल निर्वाचन आयोगमा दर्ता गराएको चर्चा चलेको थियो । जसपाले कारबाही गरेपछि उनले दल दर्ताका लागि राजनीतिक छलफललाई तीव्र बनाएका छन् ।