नेकपा एमाले लुम्बिनी प्रदेशस्तरीय संगठन व्यवस्थापन तथा परिचालन विषयक दुई दिने कार्यशाला शुक्रवारदेखि बुटवलमा शुरू भएको छ । 

पार्टीको आन्तरिक जीवनमा देखा परेका समस्याको समाधानमा गर्न कार्यशाला आयोजना गरिएको हो । कार्यशालाले आउँदो निर्वाचन केन्द्रित कार्यक्रमको योजना बनाउने, संगठनले गर्ने कामको योजना बनाउने केन्द्रीय सचिव तथा प्रदेश इन्चार्ज छविलाल विश्वकर्माले जानकारी दिए । 

उनले पार्टीको संगठनात्मक अवस्था, समस्या र समाधानसम्बन्धी कार्यपत्र प्रस्तुत गर्दै पार्टीभित्र देखिएका समस्या र तिनको समाधानका उपायबारे विचार प्रस्तुत गरेका थिए । उनले पार्टीमा अध्ययनमा उदासिनता देखिएको, आत्मकेन्द्रित चिन्तन प्रवृत्तिको विकास भइरहेको, निर्देशन–बुझाई र कार्यान्वयनमा समस्या देखिएको बताएका छन् । 

स्थानीय तहको निर्वाचनमा भएका घात–प्रतिघात, त्यसबाट लिनुपर्ने शिक्षा, संस्कार–संस्कृति र कार्यशैली तथा आगामी दिनमा गर्नुपर्ने कामको बारेमा पनि जानकारी उनले गराए । 

सो अवसरमा पार्टी केन्द्रीय संगठन विभाग प्रमुख खगराज अधिकारीले वैचारिक रूपमा स्पष्ट र संगठनात्मक रूपले सवल र सुदृढ, भावनात्मक रूपमा एकतावद्द, जनतासँग घनिष्ठ सम्बन्ध बढाउनु तथा शैलीगत रूपमा जनमुखी हुनुपर्ने विचार राखेका थिए ।

कार्यशालामा प्रस्तुत कार्यपत्रमाथि आधारित भएर पाँचवटा समूह बनाएर छलफल गर्ने र दोस्रो दिन प्रस्तुत गर्ने योजना रहेको छ । 

कार्यशालामा प्रदेश कमिटीका सचिवालय सदस्य, प्रदेशभित्रका सबै जिल्लाका पार्टी अध्यक्ष, इन्चार्ज, सहइन्चार्ज, संगठन विभाग प्रमुख, जनसंगठनका प्रमुख लगायतको सहभागिता रहेको प्रदेश प्रचार विभाग प्रमुख डिआर घिमिरेले बताए । 

शनिवार हुने कार्यक्रममा उपाध्यक्ष विष्णुप्रसाद पौडेलले प्रशिक्षण दिनेछन् । प्रदेश कमिटीले साथै यही २०–२१ गते प्रदेशस्तरीय प्रशिक्षण कार्यक्रमको आयोजना गरेको छ । जसमा उपाध्यक्षद्वय सुवास नेम्वाङ र विष्णु पौडेल, महासचिव शंकर पोख्रेल र उपमहासचिव प्रदीप ज्ञवालीले प्रशिक्षण दिनेछन् ।

प्रदेशको प्रशिक्षणपश्चात् जिल्ला एवं वडा तथा टोलस्तरमा प्रशिक्षण कार्यक्रम सञ्चालन गर्ने योजना रहेको प्रदेश कमिटीका अध्यक्ष राधाकृष्ण कँडेलले बताए । कँडेलले पहिले पार्टीको संगठनात्मक संरचनाबारे तयारी गरेपछि प्रदेशस्तरको प्रशिक्षण गर्न लागिएको बताए ।