सरकारले बर्खास्त गरेको नेपाल वायुसेवा निगमका कार्यकारी अध्यक्ष युवराज अधिकारी महत्वपूर्ण फाइल लिएर फरार भएका छन् । बिहीवार सरकारको बर्खास्तीमा परेका अधिकारी आइतवार बिहान पौने ११ बजे कार्यालय प्रवेश गरेको र महत्वपूर्ण फाइल लिएर पौने १२ बजे कार्यालयबाट बाहिरिएको निगमका कर्मचारीले बताएका छन् । 

वायुसेवा निगमका कर्मचारी संघका अध्यक्ष मानबहादुर कुँवरका अनुसार अधिकारीले गुण्डागर्दी शैलीमा कार्यालय प्रवेश गरेका थिए । उनले भने ‘निगमका कर्मचारी ड्युटीमा रहेका बेला अधिकारी जबरजस्ती कार्यालय प्रवेश गरेर महत्वपूर्ण फाइलसहित बीएए ६०३९ को सरकारी गाडी लिएर फरार भएका छन् ।’

कुँवरले भने ‘अधिकारीले ४÷५ जना बाहिरबाट गुण्डा लिएर आएका रहेछन् । निगमका कर्मचारी सबै काममा थिए । उनले जबरजस्ती कार्यालय प्रवेश गरेर एक घण्टामै केही फाइल लिएर निस्किएका छन् ।’

अधिकारीलाई निलम्बन गरेको पत्र नपुगेकोले उनी कार्यालय प्रवेश गरेको हुनसक्ने पर्यटन मन्त्रालयका सहसचिव होमप्रसाद लुइँटेलले बताए । उनका अनुसार मन्त्रिपरिषद्को निर्णय सार्वजनिक भइसकेकोले पत्र पाउन ढिलो भएको भए पनि त्यसरी गैरजिम्मेवारीपूर्ण काम भने अधिकारीले गर्नु हुँदैन थियो । यो विषयमा के भएको रहेछ आफूले पनि थप बुझ्नुपर्ने उनको भनाइ छ । 

गत बिहीवारको मन्त्रिपरिषद् बैठकले उनलाई बर्खास्त गर्ने निर्णय गरेको थियो ।

अधिकारीले लिएर गएको भनिएका केही निर्णयहरू

याे पनि

सरकारले बर्खास्त गरेका नेवानि अध्यक्ष अधिकारी नियमित काममा