भारत र अमेरिकाबीच गत अप्रिलमा भएको मन्त्रीस्तरीय बैठकको सकारात्मक परिणाम देखिन थालेको छ । अप्रिलमा दुई देशका रक्षामन्त्री तथा विदेशमन्त्रीबीच वार्ता भएको थियो । उक्त वार्तापछि पहिलोपटक अमेरिकी नौ सेनाको जहाज मर्मतका लागि भारत आएको छ । अमेरिकी नौसेनाको उक्त जहाजको मर्मत भारतको एलएन्डटीको तामिलनाडुस्थित शिपयार्ड गरिने छ । 

११ दिनमा मर्मत सकिने 

ताइवान मामिलामा चीनसँग सम्बन्ध बिग्रिएको बेला अमेरिकी नौ सनाले जहाज मर्मतका लागि भारत ल्याएको हो । दुई देशका मन्त्रीहरूबीच चीनको गतिविधिलाई मध्यनजर गर्दै भारत र अमेरिकाबीच सुरक्षा क्षेत्रमा सहयोग बढाउने सहमति भएको भारतीय सञ्चारमाध्यमहरूले जनाएका छन् । 

पछिल्लोपटक अमेरिकी नौ सेनाको जहाज ‘चाल्र्स ड्रिउ’ मर्मतका लागि भारत आइपुगेको छ । उक्त जहाजको मर्मतसम्बन्धी कार्य एलएण्डटीको काटुपल्लीस्थित शिपयार्डमा गरिनेछ । जसमा ११ दिन लाग्ने अनुमान गरिएको छ । आगामी दिन थप अमेरिकी जहाजहरू मर्मतका लागि भारत आउनसक्ने बताइएको छ । 

अमेरिकी जहाजलाई लिन भारतीय रक्षा सचिव डा.अजयकुमार, भाइस चिफ अफ नेवल स्टाफ कमाण्डिङ रियर एडमिरल एस वेंकट तथा रक्षामन्त्रालयका उच्च अधिकारीहरू शिपयार्ड पुगेका छन् । चेन्नईस्थित अमेरिकी दूतावासका काउन्सिल जनरल जुडिथ रभिन र नयाँ दिल्लीस्थित अमेरिकी दूतावासका रक्षा सहचारी रियर एडमिरल माइकल बेकर पनि शिपयार्ड पुगेका छन् । 

भारतीय रक्षासचिव डा. अजयकुमारले भारतीय शिपयार्ड उद्योग र भारत–अमेरिका सम्बन्धका लागि यो ऐतिहासिक दिन भएको बताएका छन् । उनले अमेरिकी नौ सेनाको जहाजलाई भारतमा स्वागत गर्न पाउँदा उत्साहित भएको बताए ।