नेपाली चलचित्र ‘प्रकाश’को च्यारिटी शो पनि हुने भएको छ । आउँदो भदौ १० गतेदेखि प्रदर्शनमा आउने तयारीमा रहेको चलचित्रको प्रदर्शनको अर्को दिन (भदौं ११ गते) काठमाडौंमा च्यारिटी शो गर्न लागिएको हो । नयाँ बसपार्कस्थित बिजी मलमा दिउँसो २ः३० बजे चलचित्रको च्यारिटी शो राखिएको छ । 

च्यारिटी शोको उद्धेश्य भने विद्यार्थीहरुलाई छात्रवृत्ति प्रदान गर्ने रहेको निर्माण टिमले जनाएको  छ । 

तारकेश्वर नगरपालिकाभित्र अध्ययनरत सामुदायिक विद्यालयका गरिब तथा जेहेन्दार विद्यार्थीहरुलाई छात्रवृत्ति प्रदान गर्ने हेतुले च्यारिटी शोको आयोजना गर्न लागिएको निर्माता महेन्द्र अधिकारीले जानकारी दिए । 

चलचित्र शिक्षासँग सम्बन्धित रहेको र शिक्षाकै लागि सहयोगी हात बन्न च्यारिटी शो गर्न लागिएको जनाइएको छ । च्यारिटी शोका लागि ८ सय रुपैयाँ टिकटदर तोकिएको छ । 

विकट गाउँको एक युवाले शिक्षक बन्न गर्ने संघर्षको कथामा निर्माण भएको ‘प्रकाश’लाई दिनेश राउतले निर्देशन गरेका हुन् । चलचित्रमा प्रदीप खड्का, दीया मास्के, रेनु योगी, प्रकाश घिमिरे, राजन खतिवडालगायतका कलाकारहरूले अभिनय गरेका छन् । चलचित्रमा विकास सुवेदीको लेखन छ ।