भक्तपुरका बेसबल खेलाडीहरूले नेपालको प्रतिनिधित्व गर्दै अन्तर्राष्ट्रियस्तरको क्याचबल क्लासिक प्रतियोगितामा सहभागिता जनाएका छन् । जापान व्यावसायिक बेसबल खेलाडी संघ र फुकुसिमा बेसबल परियोजनाले आयोजना गरेको ‘क्याच–बल क्लासिक २०२२’ प्रतियोगितामा भक्तपुरको चाँगुनारायण नगरपालिका र भक्तपुर नगरपालिकाका खेलाडीहरूले सहभागिता जनाएका हुन् । 

चाँगुनारायण नगरपालिकाबाट भक्तपुर बेसबल तथा सफ्टबल क्लब ‘राईजिङ स्टार्स’ र भक्तपुर नगरपालिकाकाबाट ख्वापा किंग्स क्लबका खेलाडीहरू सहभागी भएका थिए । अनलाइन प्रविधिको माध्यमबाट गरिएको उक्त प्रतियोगितामा नेपालसहित चीन, थाइल्याण्ड, भियतनाम, कोरिया, फिलिपिन्स, अष्ट्रेलिया, जापान, न्यूजील्याण्डलगायत मुलुकका खेलाडीहरूको पनि सहभागिता रहेको नेपाली राष्ट्रिय बेसबल टोलीको प्रमुख प्रशिक्षक रोशन थापाले जानकारी दिए । 

प्रतियोगितामा नेपालको तर्फबाट १६ वर्ष मुनिका र १६ वर्षमाथिका गरी दुई टोलीले सहभागिता जनाएका थिए । जसमा १६ वर्ष मुनिको टोलीले ६८ अंक मात्रै जोडेको थियो भने १६ वर्षमाथिको टोलीले ९९ अंक जोड्न सफल भएको थियो । 

क्याचबल खेल बेसबलको ओरिजिन हो, जसमा ९ जना खेलाडी दुई भागमा विभाजन हुने गर्छन् । एक भागमा ५ र अर्को भागमा ४ जना हुन्छन् । दुई मिनेटको समयमा जुन टिमले धेरै क्याच खेल्न सक्छ त्यो टिम विजयी हुन्छ । पहिलो हुने मुलुकले १ सय ८ अंक जोडेको थियो । क्याचबल खेलको माध्यमबाट दुई देशका बेसबल खेलाडीबीच संस्कृति आदानप्रदान गर्ने उद्धेश्य राखिएको थापाले बताए । प्रतियोगितामा नेपालका राष्ट्रियस्तरका खेलाडीहरूले पनि सहभागिता जनाएका थिए ।