प्रेस सेन्टर नेपालको चौथो महाधिवेशनबाट निर्वाचित केन्द्रीय पदाधिकारी र केन्द्रीय सदस्यलाई सम्मान गरिएको छ ।

प्रेस सेन्टर नेपाल ललितपुर जिल्ला शाखाद्वारा सोमवार आयोजित कार्यक्रममा नेकपा माओवादी केन्द्रका नेता तथा ऊर्जा, जलस्रोत तथा सिँचाइमन्त्री पम्फा भुसालले नवनिर्वाचित सबै पदाधिकारीलाई सम्मान तथा कार्यकालको शुभकामना व्यक्त गरिन् ।

सो अवसरमा मन्त्री भुसालले नवनिर्वाचित पदाधिकारीले परिवर्तनका पक्षमा निरन्तर कलम चलाउने पत्रकारको हकहितका लागि आवाज उठाउने विश्वास व्यक्त गरिन् । उनले आगामी दिनमा संगठनले संघीय लोकतान्त्रिक गणतन्त्रका पक्षमा पत्रकारितामार्फत सहयोग पुर्‍याउनुपर्नेमा जोड दिँदै भनिन्, ‘यो परिवर्तन हामीले ल्याएका हौं, हामीले नै यसको रक्षा गर्नुपर्छ ।’

जनयुद्धका समयमा रेडियो गणतन्त्र स्थापना गरेर गणतन्त्रको आवाज उठाएको स्मरण गर्दै मन्त्री भुसालले भनिन्, ‘जनयुद्धका बेला पत्रकार कलमी सेना हुनुहुन्थ्यो, यहाँहरूले गणतन्त्र स्थापना गर्नका लागि महत्त्वपूर्ण योगदान गर्नुभएको छ, यसलाई संवद्र्धन गर्नका लागि पनि यहाँको महत्त्वपूर्ण भूमिका रहन्छ ।’

उनले सहमतिबाट पदाधिकारी चयन गरी संगठनलाई केन्द्रिकृत एवं एकीकृत गरेकामा ‘प्रेस सेन्टर नेपाल’लाई बधाई ज्ञापन गरेकी छन् ।