आगामी प्रतिनिधि र प्रदेश सभा सदस्य निर्वाचनमा भाग लिने प्रयोजनका लागि नेकपा (एमाले)ले दल दर्ता गराएको छ । एमालेले मंगलवार निर्वाचन आयोगमा दल दर्ताका लागि निवेदन दिएको हो । 

महासचिव शंकर पोखरेल नेतृत्वको एमाले टोलीले कान्तिपथस्थित निर्वाचन आयोगको कार्यालय पुगेर प्रदेश र प्रतिनिधि सभा सदस्य निर्वाचन प्रयोजनका लागि दल दर्ता गराएको हो । संविधान र कानूनी व्यवस्थाअनुसार आगामी मंसिर ४ गते हुने निर्वाचनका लागि दल दर्ता गराएको महासचिव पोखरेलले जानकारी दिए । 

उनले आफ्नो पार्टी दल दर्ता गरेसँगै सो निर्वाचनको तयारीमा पनि विधिवत रुपमा प्रवेश गरेको बताएका छन् । त्यसअवसरमा महासचिव पोखरेलले एकपटक दर्ता भइसकेको दल पटक–पटक हरेक निर्वाचन प्रयोजनका लागि निर्वाचन आयोगमा दर्ता गराउने कुरा आवश्यक नभएको प्रतिक्रिया समेत दिए । 

‘लोकतन्त्रमा आवधिक निर्वाचन अनिवार्य र आवश्यक विषय हो । हाम्रो संविधानले प्रत्येक निर्वाचनको समयमा दलहरू दर्ता गर्ने व्यवस्था गरेको छ । यो व्यवस्था चाहिँ सुधार गर्नुपर्छ भन्ने लाग्छ मलाई’, उनले भने, ‘दलहरू एक पटक दर्ता भइसकेपछि पटक–पटक दर्ता गरिरहने कुरा आवश्यक विषय होइन । तर, पनि हाम्रो संविधान, कानूनले जे व्यवस्था गरेको छ । त्यसअन्तर्गत हामीले दल दर्ता गरेका छौँ । र, हामी निर्वाचनको तयारीमा विधिवत रूपमा प्रवेश गरेका छौँ ।’

निर्वाचन आयोगले आगामी मंसिर ४ गते आइतवार हुने निर्वाचन प्रयोजनका लागि यही साउन ३१ गते कार्यालय समयभित्र सबै राजनीतिक दलहरूलाई दल दर्ताका लागि आह्वान गरेको थियो । 

दल दर्ताका लागि एमाले महासचिव पोखरेलसहित उपमहासचिवद्वय प्रदीप ज्ञवाली, विष्णु रिमालसहितका नेताहरू निर्वाचन आयोग पुगेका थिए ।