चीनसँगको अन्तर्राष्ट्रिय व्यापारिक नाका रसुवागढी जोड्ने सडकमा ठूलो पहिरो गएको छ । 

पहिरोका कारण बेत्रावती कालिकास्थान तथा बेत्रावती मैलुङ दुवै सडक अवरुद्ध भएको रसुवाका प्रमुख जिल्ला अधिकारी नवराज जैसीले लोकान्तरलाई जानकारी दिए । 

उत्तरगया गाउँपालिका ५, बनुवाघुम्तिमा सडकमा पहिरो खसेको उनले जानकारी दिए । 

सो सडक पासाङल्हामु राजमार्ग अन्तर्गत रहेको छ । 

सडक पूर्णरुपले क्षति भएको र आफूहरू पहिरो गएको स्थलतर्फ जाँदै गरेको प्रमुख जिल्ला अधिकारी जैसीले बताए । 

उनले भने,‘अब करीब १ घन्टामा हामी त्यहाँ पुग्छौँ ।’

उनका अनुसार, पहिरो ठूलो गएका कारण सडक आजै खुलाउने सम्भावना कम रहेको बुझिएको छ ।

यद्यपी विकल्पहरूको खोजी भने गर्ने उनले जानकारी दिए । 

पहिरोस्थलतर्फ प्रहरीको टोली निस्किसकेको छ । 

सडक बन्द भएका कारण रसुवाको सदरमुकाम धुन्चे, रसुवागढी नाका, गोसाईँकुण्ड, लाङटाङ लगायतका स्थानमा जान समस्या भएको समेत प्रहरीले जनाएको छ ।