पोखराको फूलबारी रिसोर्ट किन्न एउटा मात्रै व्यापारिक कम्पनीको आवेदन परेको छ ।

पोखराको पाँचतारे होटल फूलबारी रिसोर्टका सञ्चालक पियुसबहादुर अमात्यले नेपाल बैंकबाट लिएको साढे ३ अर्ब रुपैयाँ ऋण तिर्न नसकेपछि उनको रिसोर्ट लिलामीमा गएको थियो ।

लिलामीबाट सकार्न आवेदन दिने कम्पनीले साँवाभन्दा कम प्रस्ताव हालेकाले रिसोर्ट लिलामी नै भएन ।
 
साँवाभन्दा कम रकम कबोल गरेर लिलामी परेको र एउटा मात्रै कम्पनी भएकाले प्रतिस्पर्धा बढाउन बैंकले पुनः लिलामी प्रक्रिया अगाडि बढाउने भएको छ ।

बैंकले साउन ५ गते अन्तिम समय दिएर लिलामीको सूचना निकालेको थियो । सूचनाको समय सकिने अन्तिम समयमा अमात्यले लिलामी रोक्न जिल्ला अदालत काठमाडौंमा मुद्दा हालेका थिए । अमात्यले लिलामी रोकिपाउँ भनेर हालेको मुद्दाका ४ गते जिल्ला अदालतमा बहस हुँदै गर्दा उनी उच्च अदालत पाटन गएका थिए । 

उच्च अदातले साउन ५ गते लिलामी तत्काललाई स्थगन गरी साउन १५ गते छलफलमा आउन आदेश दिएको थियो । आदेशअनुसार साउन १७ गते उच्च अदालतले लिलामी प्रक्रिया रोक्नु नपर्ने र अन्तरकालीन आदेश जारी गरिरहनु नपर्ने आदेश गरेको थियो ।

लिलामी प्रक्रिया रोक्नु नपर्ने आदेशपछि एउटा मात्रै कम्पनीले आवेदन दिन भ्याएको थियो । अरु कम्पनीको आवेदन नपरेको हुँदा रितपूर्वक नै आवेदन परेको कम्पनीको प्रस्ताव खोलिसकेपछि पुनः नयाँ प्रक्रियामा जाने र प्रतिस्पर्धा बढाउने गरी साउन २२ गते निर्णय भएको नेपाल बैंकले जानकारी दिएको छ । बैंक स्रोतले दिएको जानकारीअनुसार प्रस्ताव करीब पौने ३ अर्ब रुपैयाँको थियो ।

फूलबारी रिसोर्टले बैंकलाई तिर्नुपर्ने रकम २०५५ सालसम्मको साँवा १ अर्ब ३० करोड रुपैयाँ थियो । बैंकलाई तिर्नुपर्ने साँवा यस पुनर्मुल्यांकनबाट २०७६ सालमा ३ अर्ब ४७ करोड रुपैयाँ साँवा तोकिएको थियो । फूलबारी रिसोर्टले लिएको यस्तो ऋणको सबै साँवा र ब्याज हिसाब गर्दा ३५ अर्ब रुपैयाँभन्दा माथि पुग्ने पनि नेपाल बैंकले जानकारी दिएको छ ।