जनता समाजवादी पार्टी (जसपा)का अध्यक्ष उपेन्द्र यादवले राष्ट्रपति विद्या भण्डारीले नागरिकता विधेयक फिर्ता गरेर असंवैधानिक काम गरेको आरोप लगाएका छन् । राष्ट्रपतिको कदमले नागरिकलाई राज्य विहीनताको अवस्थामा पुर्‍याउने यादवले बताए । 

राष्ट्रपतिबाट नागरिकता विधेयक फिर्ता भएपछि लोकान्तरसँग कुरा गर्दै अध्यक्ष यादवले संसदले पारित गरेको विधेयक फिर्ता गर्नु दुर्भाग्यपूर्ण भएको बताएका हुन् । ‘राष्ट्रपतिको कदम असंवैधानिक छ, कुनै व्यक्तिलाई नागरिकताविहीन बनाउने कदम स्वीकार गर्न सकिँदैन,’ यादवले लोकान्तरसँग भने, ‘राष्ट्रपतिबाट दुर्भाग्यपूर्ण काम भयो । संसदले यो विधेयक पुनः पठाउँछ ।’

राष्ट्रपति भण्डारीले आइतवार नागरिकता विधेयक फिर्ता गरेकी थिइन् । लोसपा नेता राजेन्द्र महतोले पनि राष्ट्रपतिले नागरिकता विधेयक फिर्ता गरेर मधेसी जनताको भावनामाथि कुठाराघात गरेको आरोप लगाएका छन् ।