सत्तारुढ ५ दलीय गठबन्धनले आगामी चुनावमा सिट बाँडफाँटका लागि गठन गरेको कार्यदलको बैठक सकिएको छ । 

प्रधानमन्त्री निवास बालुवाटारमा सोमवार बसेको बैठकले बाँडफाँट टुंगो लगाएर प्रतिवेदन बनाउने तयारी गरेको छ ।

कार्यदलका संयोजक एवं नेपाली कांग्रेसका पूर्व महामन्त्री कृष्णप्रसाद सिटौलालाई आगामी बैठकमा सिट बाँडफाँटको प्रस्ताव ल्याउने जिम्मेवारी दिइएको छ ।

कार्यदलका सदस्य तथा सरकारका प्रवक्ता ज्ञानेन्द्रबहादुर कार्कीले बैठकबाट बाहिरिँदै गर्दा भने, ‘हामीले सकेसम्म हाम्रै तहमा मिलाएर नेतृत्वमा प्रतिवेदन दिने मनसाय बनाएका छौं ।’

सिट बाँडफाँटका लागि २०७४ सालको चुनावको समानुपातिक र गत स्थानीय चुनावको मतको तथ्य तथ्यांकलाई आधार बनाउने सहमति भएको कार्कीले जानकारी दिए । 

कार्यदलको बैठक आगामी बुधवार दिउँसो ४ बजे बस्ने र सोही बैठकमा सिट बाँडफाँटको सहमति गर्ने नेताहरूले बताएका छन् । 

मन्त्री कार्कीले भने, ‘सिट बाँडफाँट चाँडै गर्नुपर्छ । यो जिम्मेवारी हामी चाँडै टुंगो लगाउँछौं । आगामी बैठकपछि तपाईंहरूलाई केही भनौंला ।’