नेपाल समाजवादीका पार्टीका नेता डम्बर खतिवडाले आगामी निर्वाचनमा नेकपा माओवादी केन्द्रसँग सहकार्य गर्ने निर्णय गरेका डा.बाबुराम भट्टराईको साथ छाडेका छन् । 

मंगलवार बिहान ट्वीटरमा सन्देश लेख्दै नेता खतिवडाले नेसपा परित्याग गरेको घोषणा गरेका हुन् । उनले नेसपा–माओवादीको एउटै चिह्न हँसिया हथौडाबाट चुनाव लड्ने निर्णयप्रति असन्तुष्टि जनाउँदै पार्टीको साधारण सदस्यसमेत नरहने गरी पार्टी परित्याग गरेको उल्लेख गरेका छन् । 

उनले सन्देशमा लेखेका छन्, ‘करिब ८ बर्षको सहकार्यका लागि डा. बाबुराम भट्टराई र साथै करिब ३ बर्षको सहकार्यका लागि उपेन्द्र यादव र उहाँहरुको टिमप्रति आभारी छु । आजबाट जसपा–नेसपा लफडाबाट पुर्णतः मुक्त छु । नेसपा–माओवादी एउटै चिन्ह हसिँया–हथौडाबाट चुनाव लड्ने निर्णयपछि अब म नेसपाको साधारण सदस्य पनि रहिन । धन्यवाद ।’ 

डा. भट्टराईले माओवादी छाडेर नयाँ शक्ति पार्टी गठन गरेपछि उनी नयाँशक्ति पार्टीमा जोडिएका थिए । नेसपा छाडेका उनले साेमवार साझा विवेकशील पार्टी छाडेका मिलन पाण्डे, केशव दाहाललगायतसँग छलफल गरेका थिए ।