निर्माण व्यवसायी शारदा अधिकारीले विभिन्न सडक आयोजनाको ठेक्का लिएर समयमा काम पुरा नगरेको भन्दै आलोचित हुँदै आएका छन् । त्यसमाथि अधिकारीलाई माओवादी केन्द्रका अध्यक्ष प्रचण्डबाटै संरक्षण हुने गरेको आरोप लाग्ने गरेको छ । 

यस्तो आरोप लाग्नुको कारण हो–अधिकारी प्रचण्डको घरबेटी हुनु । केही वर्षदेखि प्रचण्ड अधिकारीको खुमलटारस्थित घरमा बस्दै आएका छन् । प्रचण्डकै संरक्षणमा उनले ठेक्कापट्टाका काम हत्याउने र समयमा पूरा नगर्ने प्रवृत्ति बढेको आरोप लाग्ने गरेको छ । कैयन पटक अधिकारीलाई कारबाही गर्न माग गर्दै स्थानीयले आन्दोलन गर्ने गरेका छन् । यस्तो आन्दोलन नगरकोट सडक खण्ड होस् या पासाङ ल्हामु राजमार्गका स्थानीयले नै किन नहोस्, उनीहरुले शारदाको लापरबाही र राज्य संयन्त्रको बेथितिका बारेमा कटाक्ष गर्दै आएका छन् । 

यस्तै कटाक्ष काठमाडौं महानगरपालिकाका मेयर बालेन शाहले पनि गरेका छन् । उनले   उपत्यकाको फोहोर लैजान प्रयोग गरिने ककनीको बाटो विगत ८ वर्षदेखि शारदाले अलपत्र बनाएको भन्दै प्रचण्डमाथि समेत कटाक्ष गरेका हुन् । 

‘श्रीमान प्रचण्डज्यू ! उपत्यकाको फोहोर लैजान प्रयोग गरिने ककनीको बाटो विगत ८ बर्षदेखि यस्तो हालतमा बनाउने मान्छेको घरमै अङ्गरक्षक जस्तो बसेर कुन नैतिकताले भन्नु म देश बनाउँदै छु भनेर ।’ बालेनले सामाजिक सञ्जालमा कटाक्ष गरेका छन् । बालेनले सडकको दुरावस्था झल्काउने भिडियो पनि साथमा पोस्ट गरेका छन् । 
बालेनको टिप्पणीप्रति धेरैले समर्थनमा प्रतिक्रिया जनाएका छन् ।