उच्च अदालत विराटनगरले गत १ वर्षमा ३ हजार २४ मुद्दा फछ्र्यौट गरेको छ ।

सो अवधिमा अदालतले ६४ दशमलव ०६ प्रतिशत प्रगति हासिल गरेको छ ।

गत वर्ष अदालतमा जिम्मेवारी सरेर आएका १ हजार ५५३ र नयाँ ३ हजार ४४९ मुद्दा दर्ता भएका थिए । अदालतले वार्षिक ३ हजार ११४ मुद्दा फछ्र्यौट गर्ने लक्ष्य लिएकोमा ९० थान मुद्दा कम फछ्र्यौट भएको उच्च अदालतका रजिस्ट्रार जीतेन्द्रबाबु थपलियाले जानकारी दिए ।

अदालतले सरल ८२६, सामान्य १ हजार ५८५, विशेष १ र मार्ग समूहमा नपर्ने ४२ थान मुद्दा फछ्र्यौट गरेको छ । कूल लगतको १ हजार ९७८ फछ्र्यौट हुन बाँकी रहेको अदालतमा २६२ थान मुद्दा मूलतवी रहेको उनले बताए ।
    
अदालतमा कामु मुख्य न्यायाधीश सत्यमोहन जोशी थारुले ३९८, दिनेशप्रसाद यादवले १४५, कृष्णकमल अधिकारीले  ५६९, रामबहादुर थापाले १०७, राजनप्रसाद भट्टराईले ५६१, मुरारीबाबु श्रेष्ठले ६३५, मिलनकुमार राईले ६७२, किरणकुमारी गुप्ताले ५६२, जगतनारायण प्रधानले ४६७, तिलप्रसाद श्रेष्ठले ७३२, प्रेमराज ढकालले ३६६, यमुना भट्टराईले  ३८८ र तेजनराययण सिंह राईले ४२२ थान मुद्दा फछ्र्यौट गरेका छन् । 

चालू आर्थिक वर्षमा ३ हजार ३३६ थान मुद्दा फछ्र्यौट गर्ने लक्ष्य लिएको अदालतले सो अवधिमा जिम्मेवारी सरेर आएका १ हजार ९७८ मा नयाँ ३ हजार ३१६ मुद्दा दर्ता हुने र चालू आर्थिक वर्षको साउन महिनामा १८६ थान मुद्दा फछ्र्यौट भएका रजिस्ट्रार थपलियाले जानकारी दिए ।
    
मुख्य न्यायाधीशविहीन रहेको अदालतमा करीब ६ महिनादेखि कामु मुख्य न्यायाधीशमार्फत काम चलिरहेको छ । अदालतमा प्रदेश १ सरकारले १० लाख रुपैयाँ लागतमा सेवाग्राहीका लागि प्रतिक्षालय निर्माण गरेको छ । कामु मुख्य न्यायाधीश थारुले अदालतले सकेसम्म आफ्ना लक्ष्यलाई पूरा गर्ने गरी काम गरिरहेको जानकारी दिए ।