प्रतिनिधि सभाको बैठक आज (बिहीवार) बस्दै छ । 

बैठक आज बिहान ११ बजे बस्ने कार्यसूची छ । 

संसद सचिवालयका अनुसार, आज सभामुख अग्निप्रसाद सापकोटाले प्रतिनिधि सभा नियमावली, २०७५ को नियम २१० को उपनियम (४) बमोजिम १० वा सो भन्दा बढी बैठकमा अनुपस्थित सदस्यहरूको अनुपस्थितिको सूचनाहरु सभाको स्वीकृतिको लागि पेश गर्नेछन् । 

यसपछि प्रधानमन्त्री शेरबहादुर देउवाले ‘राष्ट्रिय महिला आयोगको चौधौं वार्षिक प्रतिवेदन (२०७७ श्रावण – २०७८ आषाढ)’ पेश गर्ने सम्भावित कार्यसूची छ । 

गृहमन्त्री बालकृष्ण खाँणले ‘राष्ट्रपतिबाट सन्देश सहित फिर्ता भएको नेपाल नागरिकता (पहिलो संशोधन) विधेयक, २०७९ माथि पुर्नविचार गरियोस्” भनी प्रस्ताव प्रस्तुत गर्नेछन् ।

यस्तै सो विधेयकलाई आजै पारितका लागि प्रस्ताव गर्ने समेत सम्भावित कार्यसूची रहेको प्रतिनिधि सभाको सचिव गोपालनाथ योगीले जनाएका छन् ।