‘लोकान्तर राउण्ड अप’ मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ– 
००००
प्रतिनिधिसभाले नेपाल नागरिकता ऐन, २०६३ लाई संशोधन गर्न बनेको विधेयकलाई जस्ताको तस्तै पारित गरेको छ । प्रतिनिधिसभाको आजको बैठकले राष्ट्रपति विद्यादेवी भण्डारीले सन्देशसहित फिर्ता पठाएको उक्त विधेयकलाई पारित गरेको हो । संविधानले व्यवस्था गरेको नागरिकता संशोधन विधेयक प्रतिनिधिसभाबाट पारित हुनु सकारात्मक विषय रहेको विज्ञहरुले बताएका छन् । 

सर्वोच्च अदालतका पूर्वन्यायाधीश गिरिश चन्द्रलालले नागरिकता विधेयक पारित भएर जनताको विश्वास बढेको प्रतिक्रिया दिए । उनले भने, “विधेयक पहिले नै पारित हुनुपथ्र्यो, ढिलै भए पनि सरकारले यसलाई अघि बढाएको छ, प्रतिनिधिसभाबाट पारित हुनु सकारात्मक कार्य हो । अब राष्ट्रियसभाबाट पारित हुन बाँकी छ । राष्ट्रपतिले पनि संवैधानिक व्यवस्थाअनुरूप प्रमाणीकरण गर्नुहुन्छ होला ।”
००००
 प्रतिनिधिसभाबाट पुनः पारित उक्त विधेयक अब राष्ट्रियसभामा पठाइने छ । राष्ट्रियसभाको यही भदौ ६ गते बस्ने पहिलो बैठकमा राष्ट्रपतिको विधेयकमाथि पुनःविचार गरियोस् भन्ने सन्देश टेबल हुने सङ्घीय संसद्का प्रवक्ता डा रोजनाथ पाण्डेले जानकारी दिए ।  त्यसपछिको बैठकमा प्रतिनिधिसभाबाट प्राप्त विधेयकसम्बन्धी सन्देश टेबल गरिन्छ र सो विधेयकमाथिको छलफल प्रक्रिया प्रारम्भ हुने उनले बताए । राष्ट्रियसभामा छलफल भई विधेयक पारित भएपछि सन्देशसहित प्रतिनिधिसभामा पठाइने र सभामुखले प्रमाणित गरी प्रमाणीकरणका लागि पुनः राष्ट्रपतिसमक्ष पठाइने छ । 

  पहिलो पटक पुनःविचार गर्नका लागि राष्ट्रपतिले नागरिकता विधेयकलाई सङ्घीय संसद्मा फिर्ता पठाए पनि अब पुनःविचारका लागि ठाउँ नभएको र विधेयकलाई प्रमाणीकरण गर्नुपर्ने संवैधानिक व्यवस्था रहेको छ ।

००००
राष्ट्रपति विद्यादेवी भण्डारीले नागरिकता विधेयकका सम्बन्धमा पठाएको १५ बुँदे सुझावलाई संसदले बेवास्ता गरिदिएको छ । राष्ट्रपति विद्यादेवी भण्डारीले आगामी निर्वाचनमा एमालेलाई चुनावी एजेण्डा बनाइदिने गरी नागरिकता विधेयक संसदमा फिर्ता गरेको गठबन्धनमा रहेका दलहरूले आरोप लगाएका थिए । कतिपयले भने नागरिकता विधेयकमा उल्लेख भएका कतिपय प्रावधान दीर्घकालीन रूपमा राष्ट्रलाई अहित गर्ने खालका भएकाले त्यसलाई सच्याउन आवश्यक रहेको बताउने गरेका छन् । 

तर संसदमा भने सत्तारूढ गठबन्धनले नागरिकता विधेयक ‘फास्ट ट्रयाक’बाट पारित गराएर आगामी चुनावमा मत तान्ने प्रयास गरेको आरोप एमालेका नेताहरूले लगाउने गरेका छन् । नागरिकता विधेयकको विवाद र बहसका बीच मंसिर ४ को चुनावमा दलहरुले यसलाई चुनावी मसला बनाउने निश्चित छ । ​

००००

बहुप्रतीक्षित पश्चिम सेती तथा सेती नदी जलविद्युत परियोजना निर्माण सम्भाव्यता अध्ययनका लागि नेपालले भारतसँग सहमति पत्रमा प्रारम्भिक हस्ताक्षर गरेको छ । बिहीवार परियोजनाको विकास र लगानीको खाका तयार पार्न लगानी बोर्ड र भारतको एनएचपीसी लिमिटेडबीच सम्झौता पत्रमा हस्ताक्षर भएको हो ।

हस्ताक्षर समारोहमा बोर्डका अमृत लम्सालले स्वागत मन्तव्य राखेका थिए । यसैगरी सहसचिव सागरराज गौतमले आयोजनाबारे कार्यपत्र प्रस्तुत गरेका थिए । गत सोमवार बोर्डको बैठकले पश्चिम सेती तथा सेती नदी ६ जलविद्युत परियोजनाको विकासको सन्दर्भमा एनएचपीसी लिमिटेडसँग सहमतिपत्रमा प्रारम्भिक हस्ताक्षर गर्ने निर्णय गरेको थियोे । ​
००००
नागरिक उड्ययन प्राधिकरणले ग्राउण्ड ह्याण्डलिङ सेवा शुल्कमा ५० प्रतिशत छुट दिनेगरी नेपाल एयरलाइन्सलाई पत्राचार गरेको छ । प्राधिकरणले गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलमा हुने सवै अन्तर्राष्ट्रिय उडानमा ल्यान्डिङ, पार्किङ, नेभिगेसन र सेक्युरिटी लगायतका शुल्कमा दिइएको शत प्रतिशत छुटलाई निरन्तरता दिने र ग्राउण्ड ह्याण्डलिङ्ग शुल्कमा ५० प्रतिशत सम्म छुट दिने निर्णय गरेको हो ।
००००
निर्वाचन आयोगले निर्वाचन अधिकृतको कार्यालय स्थापनाका लागि आवश्यक सहयोग र सहजीकरण गर्न सरकारलाई निर्देशन दिएको छ । 
आगामी मङ्सिर ४ गते एकै चरणमा सम्पन्न हुने प्रतिनिधिसभा र प्रदेशसभा सदस्य निर्वाचनलाई स्वच्छ, स्वतन्त्र, निष्पक्ष, विश्वसनीय र मितव्यायी रुपमा सम्पन्न गर्न नेपाल सरकार प्रधानमन्त्री तथा मन्त्रिपरिषद्को कार्यालय, गृह मन्त्रालय र सङ्घीय मामिला तथा सामान्य प्रशासन मन्त्रालयलाई बिहीबार उक्त निर्देशन दिएको हो । यस्तै आयोगले कर्मचारी व्यवस्थापनसम्बन्धी निर्देशन पनि दिएको छ । 
००००
नेकपा माओवादी केन्द्रको स्थायी समिति बैठक शुक्रवार बिहानसम्मका लागि स्थगित भएको छ । बिहीवार बिहान ९ बजेका लागि बोलाएको माओवादी केन्द्रको स्थायी समिति बैठक स्थगित गरेर अपराह्न ४ बजेका लागि बोलाइएको थियो ।
अध्यक्ष पुष्पकमल दाहाल ‘प्रचण्ड’ले पदाधिकारीको नाम प्रस्ताव गर्ने भनिएको बैठक पटक–पटक स्थगित भएको छ ।
००००
७० वर्ष उमेरसम्मका शिक्षकले मात्र अब चिकित्सा शास्त्रको स्नातक तह र स्नातकोत्तर तहमा अध्यापन गराउन पाउने भएको छ । चिकित्सा शास्त्रको स्नातक तह र स्नातकोत्तर तहमा अध्यापन गराउन योग्यता र पदलगायतका विषयमा एकरूपताका कायम गर्न चिकित्सा शिक्षा आयोगले मापदण्ड लागू गरेको छ ।
००००
आगामी निर्वाचनमा सिट बाँडफाँटलगायतबारे छलफल गर्न सत्ता गठबन्धनको बैठक बालुवाटारमा बसेको छ । प्रधानमन्त्री निवास बालुवाटारमा बिहीवार बसेको बैठकमा तालमेलको मोडालिटी र सिट बाँडफाँटको विषयमा अध्ययन गर्न गठित कार्यदलले प्रतिवेदन बुझाउने बताइएको छ ।
००००
पछिल्लो २४ घण्टामा ५४२ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयले उक्त संख्यामा संक्रमण पुष्टि भएको जानकारी दिएको हो । 
मन्त्रालयका अनुसार २ हजार ८२ पीसीआर विधिबाट परीक्षण गर्दा २२४ र २ हजार ८४८ एन्टिजेन विधिबाट परीक्षण गर्दा ३१८ जनामा संक्रमण पुष्टि भएको हो ।