आगामी असोज ७ गतेदेखि नेपाल र भारतमा एकसाथ प्रदर्शनमा आउन लागेको चलचित्र ‘प्रेमगीत ३’को दोस्रो टिजर सार्वजनिक गरिएको छ । निर्माण टिमले शुक्रवार कृष्ण–जन्माष्टमीको अवसर पारेर नेपाली र हिन्दी भर्सनमा दोस्रो टिजर सार्वजनिक गरेको हो । 

हिन्दी भाषाको टिजर चर्चित भारतीय कम्पनी ‘जी म्यूजिक कम्पनी’ र नेपाली भाषाको टिजर ओएसआर डिजिटलको युट्युब च्यानलमार्फत सार्वजनिक गरिएको छ । सार्वजनिक टिजर ५५ सेकेन्डका छन् । सार्वजनिक टिजरमा मुख्य अभिनेता प्रदीप खड्का (युवराज प्रेम)लाई जनताको ‘मसिहा’को रूपमा प्रस्तुत गरिएको छ । टिजरले साउथ चलचित्र ‘बाहुबली’को झल्को दिन्छ । पहिलोभन्दा दोस्रो टिजर अझ शसक्त बनाइएको छ । 

स्वर्गीय छेतन गुरुङ र सन्तोष सेनको संयुक्त निर्देशन रहेको ‘प्रेमगीत ३’ मल्टिस्टारर चलचित्र हो । ‘प्रेमगीत ३’मा प्रदीप खड्का, क्रिष्टिना गुरुङ, शिव श्रेष्ठ, सुनिल थापा, माओत्से गुरुङ, मनिष राउत, पुस्कर कार्की, प्रेम पुरी, अनुभव रेग्मी, सन्तोष सेन, योगिशा खत्री, समृद्धि शाही ठकुरी, लक्ष्मी बर्देवालगायतका कलाकारहरूको अभिनय छ । आशुसेन फिल्मस् प्रोडक्सनको ब्यानरमा सन्तोष सेनको निर्माण रहेको चलचित्रको लेखक स्वर्गीय छेतन गुरुङ र मन्दिप गौतम हुन् । 

साउथका दर्जनौं सुपरस्टारर चलचित्रको हिन्दी भर्सनमा आवाज भरेका डबिङ आर्टिस्टले ‘प्रेमगीत ३’को हिन्दी डबिङ गरेकाले टिजर ‘पावरफूल’ सुनिन्छ । नेपाली चलचित्र हिन्दीमा डब भएर भारतमा प्रदर्शन हुन लागेको ‘प्रेमगीत ३’ पहिलो हो । निर्माता तथा निर्देशक सन्तोष सेनका अनुसार, चलचित्रको नेपाली र हिन्दी भर्सनको ट्रेलर आगामी सेप्टेम्बर १ अर्थात भदौ १६ गते एकसाथ सार्वजनिक हुनेछ ।