काठमाडौं महानगरपालिकाका मेयर बालेन्द्र साह (बालेन) र धरान उपमहानगरपालिकाका मेयर हर्क साम्पाङबीच पछिल्लो समय फेसबुकमा घोचपेच चलिरहेको छ । काठमाडौं उपत्यकाको फोहरको विषयलाई लिएर दुई मेयरबीच छेडखानी शुरू भएको थियो । उक्त छेडखानी हालसम्म रोकिएको छैन । 

शुरूमा धरानका मेयर हर्क साम्पाङले काठमाडौं उपत्यकाको फोहर व्यवस्थापन गर्न नसकेको भन्दै बालेनको आलोचना गरेका थिए । बालेन पनि आफ्नै निर्वाचन चिह्नमा चुनाव जितेको भन्दै हर्कका विषयमा ब्यांग्यात्मक टिप्पणी गरे । दुई मेयरबीच फेसबुकमा जुहारी चलिरहेका बेला चर्चित कलाकार दीपकराज गिरीले साम्पाङ र बालेन दुवैलाई कटाक्ष गरेका छन् । 

शुक्रवार फेसबुकमा सन्देश लेख्दै उनले लठ्ठी जुँधाएर भाच्यौँ भने के टेक्छौँ, के बजाउँछौँ भन्दै कटाक्ष गरेका हुन् । उनले फेसबुकमा लेखेका छन्, ‘लठ्ठि टेक्ने हो ! आपत पर्दा बजाउने पनि हो !! लठ्ठि जुँधाएरै भाँच्यौ भने, के टेक्छौँ के बजाउछौँ ?’ 

हर्क साम्पाङ र बालेन दुवैले गत वैशाखमा सम्पन्न स्थानीय तहको निर्वाचनमा ‘लौरो’ चुनाव चिह्नबाट निर्वाचन जितेका थिए । उनीहरूको निर्वाचन चिह्नलाई उल्लेख गर्दै दीपकले दुवै मेयरलाई कटाक्ष गरेका हुन् ।