नेपाली कांग्रेसका वरिष्ठ नेता रामचन्द्र पौडेलले तनहुँको १ नम्बर निर्वाचन क्षेत्रबाट निर्वाचन जितेर मर्ने आफ्नो रहर रहेको बताएका छन् ।

शुक्रवार जिल्लाका सञ्चारकर्मीसँग कुराकानीका क्रममा वरिष्ठ नेता पौडेलले चुनाव जित्ने रहर रहेको कुरा व्यक्त गरे ।

‘तनहुँ क्षेत्र नम्बर १ मा मैले २०७४ को निर्वाचन हारेको छु, यही निर्वाचन क्षेत्रबाट निर्वाचन जित्ने मेरो रहर छ,’ वरिष्ठ नेता पौडेलले भने ।

वरिष्ठ नेता पौडेल २०७४ सालको निर्वाचनमा तनहुँ क्षेत्र नम्बर १ बाट हाल नेकपा एकीकृत समाजवादीमा रहेका कृष्णकुमार श्रेष्ठसँग हारेका थिए । तनहुँ क्षेत्र नम्बर १ बाट निर्वाचन लड्ने विषयमा नेकपा एसका अध्यक्ष माधवकुमार नेपालसँग कुराकानी गरेको र मै उठ्ने विषयमा नेपाल समेत सकारात्मक रहेका वरिष्ठ नेता पौडेलले बताए ।

तनहुँ क्षेत्र नम्बर १ बाट निर्वाचन लड्ने विषयमा आफूले जिल्लाका कांग्रेसका केन्द्रीय सदस्यहरू शंकर भण्डारी, गोविन्द भट्टराई, प्रदीप पौडेल, धु्रव वाग्ले र जिल्लाका नेताहरूसँग बसेर समेत एक चरणको कुराकानी गरेको समेत पौडेलले सञ्चारकर्मीलाई बताएका थिए ।