गृृहमन्त्री बालकृष्ण खाँणले प्रतिनिधि सभाबाट बहुमतले पारित भएको नागरिकता ऐनलाई संशोधन गर्न ल्याइएको विधेयकले राष्ट्रियतालाई बलियो बनाउने बताएका छन् । 

कृष्ण जन्माष्टमी पर्वको अवसरमा शुक्रवार काठमाडौंमा आयोजित चैतन्य झाँकी प्रवचन कार्यक्रममा गृहमन्त्री खाँणले विधेयक प्रमाणीकरण भएपछि नागरिकता पाउन नसकेका नेपाली बाबुआमाका छोराछोरी नागरिकताविहीन हुनु नपर्ने उल्लेख गरे ।  

विक्रम संवत् २०७२ सालमा संविधान बनेपछि कानून बनाउन नसक्दा नागरिकता पाउन नसकिएका युवालाई नागरिकता दिने उद्देश्यसहित विधेयक ल्याइएको उनले बताए । ‘नेपाली नागरिकता भएका बुवाआमाका छोराछोरीलाई नेपाली नागरिकता दिनुपर्ने थियो तर २०७२ सालमा संविधान जारी भएपछि कानून बनाउन नसकिएकाले नागरिकता दिन सकिएको थिएन, अहिले सरकारले नागरिकता पाउन नसकेका नेपाली बुवाआमाका छोराछोरीलाई नागरिकता दिन विधेयक अगाडि बढाएको हो,’ गृहमन्त्री खाँणले भने । 

विधेयकलाई सबैले साथ दिनुपर्ने आवश्यकता उनले औंल्याए ।