रुसका राष्ट्रपति भ्लादिमिर पुटिनको दिमाग मानिने अलेक्जेन्डर डुगिनकी छोरी दारियाको कार बम विस्फोटमा मृत्यु भएको छ । 

राजधानी मस्कोबाट बाहिरपट्टि रहेको ठाउँमा कार विस्फोट भएको हो । 

डुगिनका मित्र पिटर लुन्डस्ट्रेमका अनुसार, उनी र उनकी छोरी जाखारोभो ईस्टेटमा परम्परागत परिवार पर्वमा अतिथिका रूपमा पुगेक थिए । त्यहाँबाट उनीहरू एउटै गाडीमा निस्कन लागेका थिए । 

तर डुगिनकी छोरीले उनको गाडी लिएर गइन् भने डुगिन अर्र्कै गाडीमा गए । दारियाले टोयोटा ल्यान्डक्रुजर गाडी स्टार्ट गर्नेबित्तिकै विस्फोट भयो । विस्फोटमा कार आगोको गोलामा परिणत भयो । 

घटनास्थल डुगिन पनि पुगेका थिए । उनी स्तब्ध हुँदै टाउकोमा हात राखेको देखिएको थियो । 

युरेसियालाई उच्च महत्त्व दिने सिद्धान्तको प्रतिपादन डुगिनले नै गरेका हुन् । 

स्वघोषित डोनेत्स्क जनगणतन्त्रका नेता डेनिस पुशिलिनले यस आक्रमणको खास तारो डुगिन भएको बताए । युक्रेन समर्थित आतंकवादीहरूले यो आक्रमण गरेको उनको भनाइ छ । 

डुगिन र छोरी दारिया दुवैलाई पश्चिमले प्रतिबन्ध लगाएको छ । रुसी प्रचारबाजी गरेको आरोपमा यो प्रतिबन्ध लगाइएको हो । 

गत मार्च महिनामा दारियाको एक अन्तर्वार्ता प्रकाशित भएको थियो । त्यसमा उनले पश्चिमलाई अधिनायकवादी, नश्लवादी र उपनिवेशवादी संज्ञा दिएकी थिइन् । 

डुगिन आफैंले लामो समयदेखि युक्रेनमाथि आक्रमणको पैरवी गर्दै आएका थिए । 

तर आरटीका अनुसार, पश्चिमले भने जस्तो गरी पुटिनले डुगिनको कुरा सुन्ने गरेका छैनन् । डुगिन सामान्य चिन्तक हुन् र पुटिनमाथि उनको कुनै प्रभाव छैन ।