कथाकार डा. राजुबाबु श्रेष्ठद्वारा लिखित ‘वेनामे जर्नेल’ कथा संग्रह सार्वजनिक भएको छ ।

प्रज्ञा भवनमा शनिवार आयोजित कार्यक्रममा लेखक तथा समीक्षक नयनराज पाण्डे, डा. लक्ष्मण गौतम र ज्ञानु अधिकारी र दीपक सापकोटाले संयुक्त रूपमा कथा संग्रहको लोकार्पण गरेका छन् । १५ वटा कथा रहेको संग्रहलाई राजकुमार बानियाँले सम्पादन गरेका छन् ।

कथामा फरक पात्र, पृष्ठभूमि सामाजिक र राजनीतिक विषयलाई समेटिएको छ । देशभित्रको सशस्त्र द्वन्द्वदेखि द्वन्द्वग्रस्त मुलुक कोर्सिया र सर्वियाका  विषयवस्तुलाई कथामा उठान गरिएको छ । पुस्तकमाथि टिप्पणी गर्दै पाण्डे, गौतम र अधिकारीले कथाकार निकै सन्तुलितरूपमा प्रस्तुत गरेको र समाजको वास्तविक कथा दस्तावेजका रूपमा आएको बताए । कथाकार श्रेष्ठले विभिन्न सयममा भेट भएका पात्र अरुको पीडाको बकपत्रको रूपमा आफूले लिपिबद्ध गरेको जानकारी दिए ।

३० वर्ष नेपाल प्रहरीमा सेवा गरेका स्रष्टा श्रेष्ठका ४ वटा  कथा संग्रहसहित ८ वटा कृति प्रकाशित भइसकेका छन् ।