गरुड सेक्युरिटीले संस्कृति, पर्यटन तथा नागरिक उड्डयनमन्त्रीले राज्य संयन्त्रको प्रयोग गरेर माफी माग्न दबाब दिएको बताएको छ । गरुड सेक्युरिटीका प्रशासकीय अधिकृत अभिषेक कार्कीले मन्त्रीले सरकारका निकायहरूमार्फत सेक्युरिटी कम्पनीले माफी माग्न दबाब दिएको बताए ।

‘उहाँले सरकारी निकायलाई प्रयोग गरेर बारम्बार माफी माग्न भन्दै दबाब दिइरहनु भएको छ । हाम्रो कर्मचारीले गल्ती गरेको छैन कसरी माफी माग्नु,’ अधिकृत कार्कीले लोकान्तरसँग भने ।

मन्त्री श्रेष्ठले राज्य शक्तिको प्रयोग गरेर सामन्ती प्रवृत्ति देखाएर आफ्नो कर्मचारीलाई ३ दिनदेखि हिरासतमा राखेको कार्कीले बताए । ‘यहाँ त पावर भएपछि जे पनि गर्न सक्छौँ भन्ने दम्भ देखियो । यो हेर्दा सरासर सामन्ती पारा भयो नी’, अधिकृत कार्कीले भने ।

आफ्नो कर्मचारीलाई अनावश्यक रूपमा हिरासतमा राखेकाले यसको कानूनी उपचारमा जाने उनले बताए । अहिले हिरासतमा रहेका शेरजंग गुरुङकी श्रीमती लक्ष्मी गुरुङ बन्दी–प्रत्यक्षीकरणको रिट लिएर अदालत गएको उनले लोकान्तरलाई बताए । 

अधिकृत कार्कीका अनुसार भीएसएसमा भएको क्लोज सर्किट टीभी (सीसीटीभी) क्यामेरामा त्यहाँ भएको गतिविधिहरूमा स्पष्ट मन्त्रीको गल्ती देखाएको छ । बिना पूर्वजानकारी मन्त्री आएर कर्मचारीलाई दूब्र्यावहार गरेको विषय गम्भीर भएको उनले बताए । उनका अनुसार गरुड सेक्युरिटीले उनकी श्रीमतीलाई कानूनी लडाइँका लागि सहयोग गरिरहेको छ ।

शेरजंगकी श्रीमती लक्ष्मी गुरुङले पावरको दुरुपयोग गरेर एउटा काम गर्ने व्यक्तिलाई हिरासतमा राख्नु गल्ती भएको र त्यसविरुद्ध कानूनी लडाइँ लड्न लागेको बताइन् ।

‘एउटा सामान्य सेक्युरिटीको काम गर्ने मान्छेलाई त्यत्रो मन्त्री भएको मान्छेले यस्तो गर्नु गलत हो,’ लक्ष्मीले लोकान्तरसँग भनिन्, ‘यसविरुद्ध कानूनी लडाइँमा लागेकी छु ।’

भीएसएसले पनि मन्त्रीले गल्ती गरेको र आफ्नो सेक्यूरीटी गार्डले सही काम गरेको भन्दै शेरजंगलाई न्याय दिलाउनलाई सहयोग गरिरहेको लक्ष्मीले बताइन् । ‘भीएसएस अफिसका सरहरूले पनि सहयोग गरिरहनु भएको छ । उहाँहरूले पनि मन्त्रीको गल्ती छ । कारबाही हुनुपर्छ हामी लड्छौँ भन्नु भएको छ’, लक्ष्मीले लोकान्तरसँग भनिन् ।

सुरक्षा गार्ड शेरजंगलाई हिरासतमा राख्नु गलत भएको भन्दै गरुड सेक्यूरीटी, भीएसएस र भूतपूर्व नेपाली सैनिक मञ्च कानूनी लडाइँका लड्न अगाडि आएको छ । शुक्रवार बिहान विदेश जान बायोमट्रिक दर्ताका लागि पूर्वजानकारी बिना मन्त्री श्रेष्ठ परिवार तथा पीएसओसहित छाँयाँ सेन्टरमा पुगेका थिए । त्यहाँ सुरक्षा गार्ड रहेका शेरजंगले उनलाई लाइनमा लाग्न भनेपछि विवाद भएको थियो । 

शेरजंगकी श्रीमती लक्ष्मी गुरुङका अनुसार उनले मन्त्रीलाई लाइनमा लाग्न अनुरोध गरेका थिए । उनले पूर्वसूचना बिना आएकाले लाइनमा बस्न अनुरोध गर्दा मन्त्रीले गाली गर्दै दूव्र्यवहार गरेको बताइन् । ‘हामीसँग सीसीटीभीको भिडियो छ । त्यो प्रमाण हो जसले उहाँको गल्ती छैन भन्ने देखाउँछ त्यो लगेर अदालत जाने तयारीमा छौँ’, लक्ष्मीले लोकान्तरसँग भनिन् ।

पूर्वसुरक्षाकर्मी परिसरका उपाध्यक्ष सुधनसिँह बस्नेतले बिनाकसूर हिरासतमा राखेका शेरजंगलाई मुक्त गर्न अनुरोध गरेको बताए । 

गृहमन्त्री बालकृष्ण खाणले प्रहरी हिरासतमा रहेका गरूड सेक्युरिटिजका सुरक्षा गार्ड शेरजंग गुरूङलाई रिहाइ गर्न निर्देशन दिएका छन् । 

गृहमन्त्री खाणले सोमवार काठमाडौंका प्रमुख जिल्ला अधिकारी गोविन्द रिजाललाई प्रक्रिया पुर्‍याएर सुरक्षा गार्ड गुरूङलाई रिहा गर्न निर्देशन दिएको मन्त्रीको सचिवालयले जनाएको छ ।