नेपाली राष्ट्रिय क्रिकेट टीमका कप्तान सन्दीप लामिछानेमाथि लागेको आरोपका सम्बन्धमा प्रहरीले अनुसन्धान र प्रमाण संकलनको काम अगाडि बढाएको छ ।

सन्दीपले १७ वर्षीया किशोरीलाई जबरजस्ती करणी गरेको भनिएको होटलको सीसीटीभी फूटेज संकलन गर्न प्रहरी टोली खटिएको हो ।

काठमाडौं प्रहरी परिसर र प्रहरी वृत्त गौशालाको टोली सीसीटीभी फूटेज संकलनका लागि खटिएको एक प्रहरी अधिकारीले लोकान्तरलाई बताए ।

पीडितको बयानमा उल्लेख भएको गौशाला र नगरकोटका छुट्टाछुट्टै दुई होटलको सीसीटीभी फूटेज संकलन गर्ने प्रहरीको तयारी छ ।

प्रहरीका अनुसार पीडित किशोरीलाई एकद्वार संकट व्यवस्थापन केन्द्र (ओसीएमसी)मा लगेर स्वस्थ्य परीक्षण गराइएको छ ।

जाहेरीमा १७ वर्षीया किशोरीलाई लामिछानेले २०७९ भदौ ६ गते राति गौशालास्थित होटलको कोठा नम्बर ३०५ मा लगी पटक-पटक जबरजस्ती करणी गरेको उल्लेख छ ।

काठमाडौं र भक्तपुरका विभिन्न स्थानमा लगी होटलमा ल्याएर मध्यरातमा जबरजस्ती करणी गरेको विवरण जाहेरीमा उल्लेख छ ।

लामिछाने क्यारेबीयन प्रिमियर लिग खेल्नका लागि अहिले वेस्टइन्डिजमा छन् । अन्तर्राष्ट्रिय सिरिजका लागि केन्या पुगेका उनी त्यतैबाट वेस्टइन्डिज गएका हुन् ।

टीमका अन्य सदस्य भने आजै स्वदेश फर्किएका छन् ।