सत्यनिरुपण तथा मेलमिलाप आयोगसम्बन्धी (टीआरसी) विधेयकमा देखिएका विवाद आजै समाधान गर्नका लागि कानुन, न्याय तथा मानवअधिकार समितिले टोली गठन गरेको छ । 

बुधबार बसेको समितिको बैठकले बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन २०७१ लाई संशोधन गर्न बनेको विधेयकका बारेमा सहमति जुटाउनका लागि विशेष टोली गठन गरेको हो । 

त्यसरी गठन गरेको टोलीमा शेरबहादुर तामाङ, विमला विक, लक्ष्मण लाल कर्ण, मीनबहादुर विश्वकर्मा, अतहर कमाल मुसलमान, देव गुरुङ र वर्षमान पुन छन् । 

आजै दिउँसो २ बजे समितिको बैठक बस्ने र सबै दलको सहमति जुटाएर प्रतिवेदन तयार गर्ने सहमति भएको समितिका सदस्यहरुले बताएका छन् । 

त्यनिरुपण तथा मेलमिलाप आयोगसम्बन्धी विधेयकमा छलफल हुने भएपछि माओवादी केन्द्रका अध्यक्ष पुष्पकमल दाहाल प्रचण्ड पनि  कानुन, न्याय तथा मानवअधिकार समितिको बैठकमा सहभागी हुन गएका थिए ।

बैठकमा सहभागी भएर प्रचण्डले समितिले सहमितका साथ विधेयक टुंगो लगाउनुपर्ने बताएका थिए । 

उनले बैठकमा भनेका थिए, ‘हामीले सहमतिका साथ टुंग्यायौं भन्दा जाने सन्देश एउटा हुन्छ । सहमति हुन सकेन वा अल्पमत बहुमत गरेर टुंग्यायौं भन्दा जाने सन्देश अर्को हुन्छ ।’ त्यसैगरी, प्रचण्ड मानवअधिकारको गम्भीर उल्लंघनका मुद्दामा विशेष अदालतले गर्ने फैसलाविरुद्ध पुनरावेदनमा जाने व्यवस्था राख्न पनि सहमत भएका छन् ।

सरकारले प्रतिनिधि सभाको कार्यकाल सकिनु अघि नै सत्यनिरुपण तथा मेलमिलाप आयोगसम्बन्धी विधेयक पारित गर्ने तयारी गरेको छ । त्यसका लागि आजै विधेयक समितिबाट पास गरेर संसदमा लैजाने सरकारको तयारी थियो । तर, आज सम्भव नहुने भएपछि बिहीबार संसदको बैठक राख्ने त्यहाँ विधेयक पेश गर्ने तयारी सत्तारूढ गठबन्धनमा रहेका दलहरुको छ ।